Eredivisie club Ajax midfielder Mohammed Kudus chuan tun World Cup chhunga a khelh that vangin  Premier League club  ngaihven a hlawh hle nia report a ni.

He kum 22-a upa hi Everton chuan nipuia lei tumin £15m pek an tiam. Mahse Ajax lam hian he player naupang hi an la thlah phal lo.

Kudus hi club lamah aiin ram team lamah hmun lailum pek a ni zawk a, kumin World Cup tan hma daih tawh atang khan English club lian Liverpool chuan an lo enthla tawh. 

Tun season Champions League-ah Liverpool leh Ajax te kha Group A-ah an awm ho a, khatah khan a that zia Reds lamin an hmu. Hetih lai hian tun season atang chauh ni lo, Ajax tana a inlan tirh atang tawhin Liverpool lam hian an lo thlithlai tawh nia report a ni.

Kumin World Cup-ah Kudus a rawn che tha hle, South Korea an hmachhawn tum khan goal hnih a khung a. Portugal an hneh loh tum khan goal an khung theih nan tha a thawh hlawk hle bawk a ni.

Liverpool leh Everton lamin an ngaihven mek laiin Black Stars tana a khelh that avang hian Arsenal, Tottenham leh Newcastle-te pawhin a chungchang hi an ngaihven niin English media te chuan an tarlang. European club hrang hrang Borussia Dortmund, PSG, Lyon, Napoli, Atletico Madrid-te pawh an bang chuang a ni awm e.

Tunah rih chuan Ajax hian Kudus chhuahtir hi an la ngaihtuah chiah lo niin a lang a. Mahse thlan hmasak ber hlawh lem lo player tana sum tamtak hnial thlak chu thil har tak a ni ve ang. 

Qatar-a a chet that avang hian a hlutna a pun nasat rin a ni lehnghal. Kudus hlutna hi £30m velah a pun chhauh rin a ni a, January transfer window inhawn huna Eredivisie chhuahsan tur nia sawi PSV player Cody Gakpo-a man nen a inthlauh vak a rinawm loh.