Tun weekend liamta Premier League kha thlir kir ang aw. Southampton chu tun season Premier League-ah a vawi khat nan hnehna an chang a, si khat faiin Everton an hneh, anni tan chuan kar chhinchhiahtlak tak a ni ngei ang.
Inrinni zan khan match hmuhnawm deuh deuh a awm, Arsenal leh Manchester City chu a rualin an tlawm khauh mai, chutih laiin Liverpool erawh an chak si, Arne Slot leh a hote chuan Premier League hma an hruai leh ta.
Arsenal chuan Newcastle United an tlawh a, si khat faiin Newcastle United an chak. Goal awmchhun hi minute 12-a lut a ni a, mual dinglam sir atanga Anthony Gordon cross tha tak chu Isak chuan a tauh goal.
Manchester City chuan Bournemouth an tlawh, 2-1 in City an tlawm. Minute 9-na lekah box veilam atanga Kerkez cross chu box chhunga Semenyo chuan dawngin, mawi taka a virpui hnuah a chhuih goal.
Second half minute 64-ah mual veilam sir atanga Kerkez cross bawk chu Evanilson chuan a tlawh goal leh a, si hnih faiin Champions lakah Bournemouth chuan hma an hruai.
Hun tawp dawn minute 8 a la awmin Gundogan-a siam chu Gvardiol chuan goal-ah chantir vein, goal dang an khung thei tawh lo, 2-1 in Bournemouth an chak ta a ni.
Anfield-ah Liverpool pawhin goal an chhuah hmasa, mahse an comeback mawi hle. Minute 14-ah mikhual Brighton tan Kadioglu chuan goal a khung, half time thlengin goal dang a lut lo.
Second half minute 69-ah Cody Gakpo cross chu Nunes chuan khawih tum mah se, a khawih duh ta lo, goal-ah a lut zawt mai.
He goal a luh atanga minute 3-na lekah Salah chuan mawi takin a chhuih goal leh. Box dinglam atangin a khalh a, a lai lamah la lutin, a ke veilam chuan a thuai a, top corner-ah a thlawk lut mawi hle.
Inkhel dangah Ipswich leh Leicester City te 1-1 in an inhnehtawk a,Nottingham Forest pawhin 3-0 laiin West Ham an hneh. Wolves leh Crystal Palace te 2-2 in an inhnehtawk bawk.
Pathianni zan zantirah Tottenham chuan Aston Villa an mikhual, mikhual team-in Rogers hmangin goal khung hmasa zuk mah se, Spurs chuan goal 4 laiin an chhang let.
Tottenham tan Solanke chuan goal hnih a khung a, Johson leh Maddison te chuan goal khat ve ve an khung.
Khelh 10 atangin Liverpool chuan point 25 an hlawhchhuak a, hmahruaitu an ni mek. Manchester City chu pahnihna niin, Reds hi point 2-in an phak lo.
Nottingham Forest chu pathumna niin, point 19 an nei a, Chelsea, Arsenal, Aston Villa leh Tottenham te chuan an dawt a ni.