Inrinni zan Premier League inkhelah Manchester City chuan Fulham an lo mikhual a, Premier League champion lai hian 2-1 in hnehna pawimawh tak an chang.
Etihad Stadium inkhelah hian City tan Julian Alvarez leh Erling Haaland te chuan goal an khung a, London club Fulham tan Andreas Pereira chuan goal a khung bawk.
Khelh 13 atangin City hian point 32 an hlawhchhuak tawh a, pakhatnaah chho in, pahnihnaa awm Arsenal nen point khatin an inthlau a, City hi khelh khatin an khel tam zawk. Fulham hian khelh 14 atangin point 19 an nei a, pariatna dinhmun an luah ve mek thung a ni.
Mual neitu lam City hian 20mins an khelh tlin hma deuhin hma an hruai a, Ilkay Gundogan chuan Alvarez ball pe in, Alvarez hian box chhung dinglam atangin goal ah ball a pet lut a, City goal hmasa zawk a thun.
Minute sawm pawh a ral leh hmain, John Stones chuan City goal hnihna a khung emaw a ti zet a, mahse Stones-a goal thun hi offside avangin pawm a ni lo.Stones-a goal pawm loh a nih hnu lawk hian box lehlamah City defender Joao Cancelo chuan Harry Wilson a nek thlu a, Fulham in penalty hlawhchhuakin, Cancelo hi referee chuan direct red card a pe bawk.
Cancelo foul dan hi direct red card inpekna khawp niin lang lo mah se, last man a ni a, Fulham goal khungna chance-a a foul avangin referee chuan loh theih lovin Portuguese full-back hi a hnawhchhuah a ngai. Manchester United player hlui Pereira chuan penalty spot atang hian chiang takin City goalkeeper Ederson a bum a, Fulham si phurh sutin, 1-1 a ni.
Norwegian striker Haaland hian a inhliam avangin City game hnuhnung pahnih a khel thei tawh lova, Fulham lakah hian bench-ah awmin, second half-a dah luh a ni. 74mins-ah Kevin de Bruyne-a’n veilam atanga ball tha tak a cross chu Haaland hian goal ah a lo tauh lut a, mahse VAR lama endik a nih hnuah Haaland-a goal hi sut a ni.
90mins an khelh pawhin 1-1 a la ni a, City hian point 2 an hloh dawn emaw tih hnuah, injury time-ah de Bruyne chuan penalty a hlawhchhuak a, Haaland chuan penalty hi goal-ah chan tirin, City hi 2-1 in an chak a, point 3 hlu tak an hlawhchhuak ta a ni.
