UEFA Champions League semi final second leg inkhelah, Manchester City chuan first leg-a 2-1 a an hneh tawh Paris Saint-Germain chu Etihad Stadium-ah lo mikhualin, 2-0 in City hi an chak.
Aggregate-ah 4-1 in nuamsa takin City an chaka, an club chanchinah a vawi khat nan Champions League final an luta, final-ah Chelsea emaw Real Madrid emaw an hmachhawn dawn a ni.
Second leg inkhela City goal hnihte hi Algerian forward Riyad Mahrez-a khung ve ve a ni a, Mahrez hian first leg-ah pawh goal khat a khung tawh.
City manager Pep Guardiola chuan kum 2011 hnuah a vawi khat nan a team chu final a luhpuia, kum 2011 hian Barcelona chu final-ah luhpuiin, a lo champion pui tawh a ni.
Manchester City 2-0 PSG (agg 4-1)
(Mahrez 11’, 63’)
Player Ratings
Chak mamawh zawk PSG lamin a tir atangin City an nawr nghala, minute nga chuang hret khelh a nihin PSG lam hian veilam atangin City box-ah ball vawrh lutin, Zinchenko-a dar a fuha, referee-in penalty pet zet mahse VAR lama endik a nih hnuah Zinchenko-a dar a fuh avangin penalty hi sut leh a ni.
City lamin goal an khung zuia, 10mins velah City goalkeeper Ederson chuan a box atangin ball a pet chhuaka, PSG half lamah Zinchenko chuan ball changin, PSG box pawn veilam atangin box pawna awm Kevin de Bruyne a pe let, De Bruyne hian goal-ah ball pet tum mahse dan sak a ni a, a thlanga awm Mahrez chuan goal-ah ball pet lutin City-in hma an hruai.
Minute nga hnu velah PSG hian City box pawn deuh lawkah freekick an hlawhchhuaka, Neymar chuan petin wall a pet pera, corner an hmu. Neymar chuan corner hi petin a pet chhe viaua, hemi hnu hian PSG lamin veilam atangin City box-ah ball an vawrh lut, Marquinhos chuan lo tauhin, crossbar a pera, PSG in goal an khung teuh hle.
20mins dawnah Ederson chuan ball a pe chhuaka, Bernardo Silva tan ball lir pheiin, Silva hian a la fuh lova, Di Maria chuan chhuhsakin, goal-ah shoot mahse a zawn lo hreta, goal-kick a ni. Half time hma lawkin City-in chance an neia, Mahrez chu box pawn veilam chiahah ball pek niin, box-ah ball a laluta, near post-ah shoot mahse PSG keeper Keylor Navas chuan a lo save a, Silva-a'n chance nei ve leh nghalin, a ke veilamin goal-a ball chhuih luh a tuma, ani pawh hi block sak a ni.
1-0 in first half a tawpa, second half tir lamah City hian chance vawi hnih neiin, a hmasa Foden-a chance tha tak chu Navas-a’n a lo dan saka, hei erawh offside niin goal pawh nise pawm theih a ni lo. Hemi hnu lawk hian Foden chuan box pawn atangin PSG goal-ah tha zetin ball a peta, Navas chuan tha takin a lo save leh.
City hian darkar khat chuang hret khelh a nihin goal an khung belha, Phil Foden chuan De Bruyne ball pe in, Foden hi box chhungah a inpawt nghal. De Bruyne chuan Foden hi ball pe leh nghalin, box chhung veilam atanga far post lama awm Mahrez chu Foden hian ball a pe thla a, Mahrez hian chiang taka lo pet goal in, 2-0 a ni a, agreggate-ah 4-1 niin PSG hma a ko hle.
70mins an khelh tlin hma deuhin PSG hma ti ko zual turin Di Maria hnawhchhuah a ni a, ball out chu Di Maria hian lak a tumna lamah Fernandinho nen an inpawt buai deuha, Fernandinho hian Di Maria zuiin, Di Maria hian ball a chhar pahin Fernandinho hi a rap luia, red card pek a ni. Player senior zinga mi Di Maria chet dan hi inkhel pawimawhah phei chuan a atthlak viau a ni.
City an hlauhawm chhunzawm zela, 76mins-ah Foden chuan chance tha zet neiin, far post lama si ban a pet per. Goal luh belh tawh lovin, 2-0 hian inkhel a tawpa, City hian an club chanchinah a vawi khat nan Champions League nomawi chawina hun tha tak an nei a ni.
