Champions lai Manchester City chu an tlawm chho nawn ta awn awn mai. Inrinni zan khan Brighton lakah an tlawm a, Liverpool erawhin si hnih faiin Villa an hneh bawk si, an inkar chu point 5 lai a ni ta.

A zawnin game 4 ngawt competition hrang hrangah Manchester City an tlawm. Spurs, Bournemouth, Sporting leh Brighton lakah zawnin an tlawm.

Inrinni zan khan Brighton an tlawh a, Haaland chuan minute 23-ah goal khung hmasa mah se, second half-ah Pedro leh O'Riley ten Brighton tan goal an khung. 2-1 in Brighton chuan hnehna an chang ta a ni.

Inrinni zan zanlaiah Liverpool chuan Aston Villa an mikhual. Darwin Nunez leh Mohamed Salah te chuan Reds tan goal an khung. 

Tun season Premier League-ah Salah hian goal 8 a khung tawh bakah assist vawi 6 lai a nei tawh a, goals + assists nei hnem ber a ni mek.

Arne Slot-a hnuaiah Liverpool an chetha hle, Champions League lamah hmahruaitu an ni a, Premier League-ah pawh point 5-in hma an hruai fal mek.

Khelh 11 atangin Liverpool hian point 28 an hlawhchhuak a, game 9-ah hnehna an chang a, vawi 1 tlawmin, vawi khat an khingpui an inhnehtawkpui.

Manchester City erawh khelh 11 atangin vawi 7 hnehna an chang a, vawi 2 an khingpui an inhnehtawkpui a, vawi 2 an chak lo.

Pathianni zan khan Manchester United chuan 3-0 in Leicester City an hneh. Bruno Fernandes leh Garnacho te chuan box pawn atangin mawi takin goal an khung ve ve a, Kristiansen chuan an lamah a ti goal bawk.

Erik ten Hag an ban hnuah Ruud van Nistelrooy chuan United a enkawl, interim manager a nih chhungin competition hrang hrangah game 4 a khelhpui a, vawi 3 chakpuiin, vawi khat an khingpui a inhnehtawkpui.

Goal 11 lai game 4 atangin an khung a, goal 3 chiah an chhuah a, awi 2 clean sheets an nei a ni.

Newcastle United chuan The City Ground-ah Nottingham Forest an tlawh. Murillo chuan Forest tan goal khung hmasa mah se, Isak, Joelinton leh Barnes ten goal an khung a, 3-1 in Magpies hian an lehthal.

Tottenham erawh anmahni mualah an tlawm tlat mai. Ipswich Town an mikhual a, Szmodics leh Delap ten first half-ah mikhual tan goal an khung a, second half-ah Bentancur chuan goal khung ve mah se, a tawk zo ta lo a ni.

Stamford Bridge-ah Chelsea chuan Arsenal an mikhual a, 1-1 in an inhnehtawk.

Arsenal tan Martinelli chuan goal a khung a, box veilam sir hnai set sawt atangin near post-ah a chhuih lut. He goal hi Pedro Neto chuan box pawn atangin mawi lutukin a rul.

Khelh 11 atangin Chelsea leh Arsenal te hian point 19 ve ve an hlawhchhuak a, goal difference-a tha zawk Chelsea chu chungnung zawk niin, pathumna an ni a, Arsenal chu palina an ni.