MMA legend pahnih Chuck Liddell leh Tito Ortiz an innuai leh dawn e. ESPN.com chuan fighter pahnihte hian Golden Boy Promotions kaltlangin fight contract(insual) an remti a, tun kum tawp hian anih rin a ni.

Golden Boy Promotions CEO Oscar De La Hoya-a chuan hetiang fight ropui a thleng leh tur hi a nghahhlelhawm tawh a, khawvel mipui tam takin an thil beisei lian tak niin a sawi. MMA fighter tha pahnih innuai leh tur hi MMA fans tan phei chuan a nghahhlelhawm tawh. MMA ngaisang tak tan chuan fighter tha an nihzia hai theih a ni awm lo e.

Fighter pahnihte intum hun tur erawh a la sawi chian theihloh. Chutih laiin tunkum anih ngei rin a ni thung. UFC light Heavyweight champion hlui Chuck Liddell-a chuan boxing ring ni lovin cage chhungah ngei a ni ang tiin a sawi zui bawk. Fighter pahnihte hi an intum tawhna thin 205 pound-ah bawk an innuai leh dawn a ni.

Boxing promoter Golden Boy hian MMA event a vawikhat promote na tur a ni dawn a, hemi fight card-a intum tur dangte pawh an zawng mek niin an sawi. An vawi 3 inhmachhawn na tur a ni dawn a, an intum hmasak lamah Chuck Liddell a lo chak tawh thin. Liddell a inringtawk hle a, ESPN.com-in an kawmnaah Tito-a hmai hnek leh hi ka thil chak ber pawl a ni tiin a inhrosa nasa hle.

Chutih laiin Tito Ortiz-a pawh a phur takzet a, MMA fighter hmachhawn ka chak ber chu Chuck Liddell-a hi a ni, a chhan chu a lakah vawi 2 lai knockout-in ka chak lova, phuba lak leh hi ka thil chak ber pawl a ti ve thung.