Turkish club Hatayspor forward Christian Atsu chu, tun kar Thawhtannia Turkey-Syria lirnghingah khan in chim hnuaiah a tang a, hun eng emaw chen a tan hnuah, Thawhlehni khan chhanchhuah a nih thu Hatayspor manager Mustafa Ozat chuan a sawi.

Turkey-Syria lirnghing hi a rapthlak hle a, mithi zat hi 4800 chuang an awm tawh niin BBC chuan a tarlanga, an awm belh zel lovang tih pawh sawi theih a ni lo.

Lirnghing intanna (epicentre) hi Hatayspor awmna khua Hatay bul lawk a ni a, Hatay pawh hi a tuar na ber te zinga mi niin, Hatayspor sporting director Taner Savut chu in chim hnuaiah hian a la tang nia sawi a ni bawk.

Kum 31 mi Atsu hi Thawhlehni zing lam khan chhanchhuah a ni a, in enkawl tura damdawi in panpui niin, a ke dinglamah hliam a nei a, a thawk lamah harsatna a nei niin chanchinbu mite chuan an tarlang.

Ghana international hi Premier League lamah pawh kan lo hmelhriat tawha, Chelsea in kum 2013 khan an lalut a, Chelsea-a a awm lai hian Everton, Bournemouth leh Newcastle United-ah te pawh loan-in a khel chhuak a, kum 2018 khan Newcastle hian a nghetin an lalut.

Newcastle tana game 107 a khelh hnuah Atsu hian Saudi Arabian club Al-Raed a zawma, nikum September thla khan Hatayspor hian an lalut ve leh. Ghana tana vawi 65 inlan tawh Atsu hian Sunday zan mai khan Hatayspor tan hian goal a khunga, a goal khat hmangin Kasimpasa an hneh nghe nghe a, a tukah erawh vanduaina a tawk ta a ni.

Turkey leh Syria hi February thla ni 6 zing lam khan lirnghing na takin a nuai a, lirnghing nat zawng hi richter scale-ah 7.8 laia na a ni. Khua a vawtin, an chhe nasa bawk nen chhanchhuah hna hi duh anga chakin a thawh theih loh niin chanchinbu mite chuan an sawi a, India pawhin tanpuina pawisa bakah, Army medical team lam a tir chhuak tawh a ni.