Chona thar hmachhawn turin Saudi ka pan

08th December 2023, 10:12PM

Karim Benzema chuan chona thar hmachhawn a duh avangin Saudi Arabia a pan tih a sawi.

French striker hian season hmasa zawh rual khan Real Madrid a chhuahsan a, kum thum daih contract ziakin Saudi Pro League club Al-Ittihad a zawm. Real hian an hnena awmzui zel turin duh mahse an thlem lungawi zo lova, Al-Ittihad hian kar khatah £3.31m vel pein hamthatna tam tak a dawng tel bawk.

Benzema chuan, "Real Madrid-a ka sulhnu leh hlawhtlinnate ka enin, chona thar hmachhawn ka duh a, boruak thar hipna hun tha tak niin ka hria. Football vang pawh nilo in, Saudi Arabia-a khawsak hi tunhma atangin ka chak tawh a, Muslim ram anni bawk nen ka rilru luahtu lian ber pakhat anni thin. Ka suangtuahna aiin a nuam a, khelmual chhung leh pawnah min hmangaihtu ka tawng hnem hle.

"Ka awmna tur takah ka awm niin ka hria a, ka chhungte pawhin nuam an ti khawp mai. Duhsakna nena minlo kuangkuahin mi zawng zawng ka chungah an tha vek a, ka thutlukna siam tawhah chuan ka tihfuh ber pakhat a ni. Saudi football-in hma a sawn theih nan tan lak ka tum a, hmachhawp leh ruahmanna an neihte pawh tih puitlin ka duh. An hmasawn dan ka hmuhin ka phur a, hei hi ka pan chhan lian tak a ni bawk. Sum ka um vanga insawn niin mi thenkhat chuan min ngai a, hei hi thudik lo hul hual a ni." tiin a sawi.

Kumin kum tira Cristiano Ronaldo-in Al-Nassr a zawm hnuah, player lar tak takten Middle East an pan khawm ruih ruih a, sum a tam bawk nen thlem luh an harsa vak hlawm lo. Saudi-a pem zingah hian  Neymar, Kalidou Koulibaly, Edouard Mendy, Roberto Firmino, Sadio Mane leh Jordan Henderson-te pawh an tel a, Europe-a an hlawh let an hlawh deuh vek bawk.

Benzema hian Tottenham boss hlui Nuno Espirito Santo hrawnin, Chelsea midfielder ni thin N'Golo Kante leh Celtic forward hlui Jota-te a khelhpui a, an pathum deuh chiah hi nipui bazar hunlai an lakluh an ni. Saudi Pro League season kal mekah game 15 khelin palina an ni a, a chung bera awm Al-Hilal nen point 13 laiin an la inthlau tawh.

Sawi chhunzawmin Benzema chuan, "Kum hmasa lama an player ngaite bawk an la ni hlawm a, mithar tlemte an nei tih loh chu danglamna vak a awm lo. In hre chiang sa an nih avangin khelh ho a awlsam a, kan tlangnel theihna turin min pui nasa em em bawk. Inlungrual taka awmin squad tha tak kan nei a, kan thlen chinah kan che chhe lutuk lo niin ka hria. A hma aia tha zawk ni turin ka bei a, nitinin hmasawnna hmuh tur ka nei.

"Muangchangin hmalam kan pan zel a, a sang thei ang ber thlen kan duh. Khelmual chhung leh training-naah kan thawkrim a, kan inpeknate a thlawna luan ram tir kan tum lo. Ka dah pawimawh ber chu nomawi chawi a ni a, a thlen dik theihna turin theihtawp ka chhuah ang." tiin a sawi.

Lyon striker hlui hian Saudi Pro League-a game 13 a khelh tawhah goal kua a khung a, midang tih goal tur vawi li a siamsak bawk. Real Madrid-a hun a hman chhungin nomawi vawi 25 an chawi a, Cristiano hnuai chiahah awmin, Los Blancos tana goal khung hnem lamah pahnihna a ni.

Copyright © inkhel.com 2025. All rights reserved.