Chinese Football Association (CFA) chuan Covid-19 avangin Asian Cup 2023 an thleng thei dawn lo tih Asian Football Confederation (AFC) hnenah an hriattir.

Asian Cup hi nakkum June leh July thlaa neih turin duan a ni a, kum 2019 khan a thlengtu tur atan China ruat an ni.

AFC chuan China dinhmun hi an hrethiam tih an tarlang a Asian Cup 2023 thlengtu tur hi an la ruat leh ang.

China hian tunhnaiah Covid-19 avangin buaina leh harsatna an tawk mek a an nunphung a khaihlak nasa hle bawk.

Hri leng avang hian September thlaa an thlen tur Asian Games 2022 pawh tiam chin awm lovin a hun sawn hlat a ni tawh.

Olympic Council of Asia (OCA) chuan Asian Games vawi 19-na ni tur hi an neih theih hun tur an puang nghal lova, ṭhutkhawmna an la nei leh phawt dawn tih an sawi.

Shantou, China-in December thlaa an thlen tur Asian Youth Games pawh ṭhulh a ni tawh bawk.

India ṭhenawm ram hian February leh March thla khan hlawhtling takin Winter Olympic Games leh Paralympics an thleng a, hri leng avangin inkhuahkirhna hnuaiah fimkhur takin an nei a ni.