Chelsea leh England left-back Ben Chilwell chuan hamstring injury avangin, World Cup-ah England ai a awh thei dawn lo tih Chelsea chuan an website kaltlangin an puang.

Tun kar Nilaini zanlaia Chelsea-in Dinamo Zagreb an hneh tum khan, Chilwell hi a inhliam a, hun tawp hma lawka lak chhuah niin, inkhelh zawhah crutch nena hmuh a ni.

Scan leh test hrang hrang te tih a nih hnuah, Chilwell hian hamstring injury serious tak a nei tih hmuhchhuah a ni a, World Cup zawhah erawh Chelsea hian an chhawr theih a rinawm.

Season hmasa khan ACL injury avangin Chilwell hi season tluan deuh thaw a lo chawl tawh a, tunah hian dam chho tanin, World Cup khelh pawh inbeisei viau mah se, World Cup khelh a beiseina a tham ral leh ta rih a ni.

Chilwell hian England tan game 17 khel tawhin, goal 1 khung a khung tawh a, nikum khan England Euro squad-ah awm mah se, he tournament-ah hian vawi khat mah a inlan lo.

Chilwell chuan, “ACL injury ka neih zawh khan, World Cup atana inpeih tumin theihtawp ka chhuah a, ka dream a ni. Vanduaithlak takin ka scan result te kan hriat hnuah chu chu a theih dawn ta lo. Tuna ka tih theih chu, Chelsea tan a rang thei ang bera inkhel leh thei tura rawn kir a ni,” tiin a sawi.