Wolves winger Daniel Podence chuan chil in chhah khum chungchangah thubuai a nei.

Kum 27 mi hian Inrinni zana Nottingham Forest an hmachhawn tum khan Forest forward Brennan Johnson chu chil a chhah khum niin an hria a, referee Chris Kavanagh-in hrem lo mahse an chhuizui ta tho.

Football Association (FA) danah chil in chhah khum hi thil mawi lo leh inhmuhsitna ang a ni a, game ruk chhung inkhel thei lova hrem theih an ni. City Ground-a inkhelah hian huntawp lamah an in tibuai a, Podence hian Johnson lamah chil a chhak ngei niin a lang.

Forest player-te hian first half-ah pawh Kavanagh an bawr luai luai a, hei vang hian hrem anni maithei. FA chuan player-te thunun zo lo tiin thubuai an siamsak a, thiamloh an chang anih chuan pawisa an chawi ang.

An club assistant manager Alan Tate leh Wolves assistant manager Pablo Sanz-te pawh thubuai siamsak anni a, tharum thawhna lam hawi anih avangin an hrem a rinawm. Wolves hian second half tir lamah penalty beisei theihna an nei a, Adama Traore chu Forest box chhungah tluin penalty an ham lo.

Hetah hian Tate leh Sanz an innawr buai a, Kavanagh chuan red card pe ve vein khelmual an chhuahsan. Podence, Nottingham Forest, Tate leh Sanz-te hian tun thla ni 12 thleng insawifiahna hun an nei a, an chetdan a dik loh hlawm em avangin an hrem vek a rinawm a ni.