Chhuanlam tur  kan nei lo - Messi

24th November 2022, 12:11PM

Lionel Messi chuan Saudi Arabia laka 2-1 a an tlawm chungchangah thiamthu sawi tur an neih loh thu a sawi.

Messi hian inkhel an tan atanga minute 10-ah penalty hmanga goal khungin Argentina chu chak mai thei dinhmunah a dinpui. Mahse minute 48-ah Saleh Alsheri chuan Saudi Arabia tan goal rawn khungin, minute 53-ah Aldawsari chuan chakna goal a khung a nih kha.

Paris saint-Germain forward Lionel Messi chuan knock out stage luh a la inbeisei hle. " Tu tan pawh khan a har khawp mai, bul kan tan dan hi ka beisei dan a ni bik lo. Chhan neiin thil chu a thleng thin. A dawt leh atan kan inbuatsaih sauh sauh a ngai, kan chak a ngai a, kan hma hun chu keimahniah a innghat ta a ni.

"Thiamthu leh chhuanlam sawi tur a awm lo, kan tan rual lehzual a ngai. Kan group-ah hian kan tha tawk a ni tih kan lantir a ngai. He dinhmun hi kan paltlang ngai zen zen loh a ni a, kan nihna dik tak kan lantir ve a hun ta e," tiin Messi chuan a sawi.

He kum 35 mi hian a World Cup khelh hnuhnung ber turah hian Argentina chu dinhmun hniam taka dah a phal hauh lo ang. Mexico an hmachhawn leh turah hian an dinhmun siam that lehnan a theihtawp a chhuah ngei a rinawm.

Group C-ah hian Saudi Arabia chuan point 3 hlawhchhuak tawhin group hmahruaitu an ni mek a. Poland leh Mexico te an inhnehtawk avangin point la hlawhchhuak ve lo Argentina tan pawh beisei tur a la awm chhunzawm zel.

1990 World Cup-ah khan an match hmasa berah Cameroon lakah si khat faiin an tlawm, khami tum khan Argentina team khan final an lut ta tho a nih kha. Mexico leh Poland an la hmachhawn leh dawn, Argentina tan chuan draw ringawt pawh a pawi tawh dawn a ni.

 

Copyright © inkhel.com 2022. All rights reserved.