Season khata goal 35 laia la inhnamhnawih thei Lionel Messi chuan, top level-a a la that zia a lantir chiang hle.
Paris Saint-Germain-a a cham chhunzawm dawn leh dawn loh chungchang sawi nan chuan a la hma deuh niin Christophe Galtier chuan a ngai a. World Cup winner hi a rilru put hmang avangin PSG boss chuan a fak bawk.
Tun season-ah Argentina international hian game 31 atangin PSG tan goal 18 a khung tawh a, assist vawi 17 a nei tawh bawk. Hetih lai hian Champions League-ah erawh an zinkawng a tawp ta.
UCL Round of 16 atanga Bayern Munich-in an pet chhuah avang khan, Argentine captain Lionel Messi hian dem a hlawh hle a nih kha.
"Board leh Leo hian inbiakna an kalpui mek tih ka hria. Mahse tun atan chuan team leh kan match neih turah chiah rilru kei chuan ka pe rih.
"Season thar lama kan kianga a awm leh awm loh chungchang chu a duh leh duh loh a ni mai. Mi tam tak titi ber a ni tih ka hria, mahse Messi hi dressing room-ah a hlim a ni.
"Tun season-ah goal 18 leh assist 17 a nei tawh a, Bayern Munich kan hmachhawn chungchangah khan sawiselna tam tak a awm tih ka hria. Mahse amah chuah a ni lo.
"Awlsam takin thutlukna a siam thei a. Thian te goal khung tur siam sak kawngah tha a thawh hlawk a, goal a khung nual bawk. Ni tinin a training ve reng a, kan hnena khelh nuam a ti reng.
"A hma hun chungchangah chuan, thil thleng tur hriat nan a la hma deuh a ni,"tiin Galtier chuan a sawi.
Kylian Mbappe chu nakina PSG captain la nihtir an rilruk leh rilruk loh Galtier chu zawh a ni a, Hugo Lloris a chawlh hnuah national team hruaitura rin a ni bawk.
"Ka hre bik lo. Kylian Mbappe hian kar hmasa khan armband a hreng a. Hetah season 6 a chamna a ni tawh, kan vice-captain zinga mi a ni a, armband hren kha a tih tur a ni. Mahse player dangte pawhin an hreng ve thei tho bawk,"tiin Galtier chuan a sawi.
PSG chuan Pathianni lo awm turah hian Rennes an mikhual dawn a, Ligue 1-ah hian point 10-a hma hruaiin, game 11 khelh tur an la nei a ni.
"Fuih phurna lam a ni lo a, infuih erawh kan ngai, Champion kan la ni lo. Point 10-in hma hruai mah ila game hmachhawp tam tak kan la nei.
"Tunah kan squad hian hliam avangin harsatna kan tawk mek a, hna thawk zo tawha kan inngaih palh vaih chuan kan tisual let der dawn.
"Kan team-te fuih phur dan kawng dang ka zawn belh a ngaiin ka hre lo a. League champion kan la ni lo, thil hi inthlak danglam thei reng a la ni. Kan infuih theihna awmchhun chu vawi 11 atan champion kan nih a ngai,"tiin Galtier chuan a sawi a ni.