Mc Dowell's No.1 Soda Mizoram Premier League Season 6 Round 1 na chu khelh zawh a ni ta a, match hnuhnung berah Chhinga Veng FC chuan 4-1 laiin Mizoram Police FC an sawp.
September ni 1, 2017 (Zirtawpni) zana inkhel hmuhnawm takah Chhinga Veng FC tan Malsawmfela chuan goal hnih a khung bakah Laldampuia leh R. Malsawmtluanga ten goal khat ve ve an khung a, MFA Super Cup best player leh I-Day best midfielder R. Malsawmtluanga chu man of the match-a thlan a ni.
Mizoram Police FC 1-4 Chhinga Veng FC
(F Lalrinpuia 21') (Laldampuia 39', Malsawmfela 45', 90+3', Malsawmtluanga 68')
Mizoram Police FC XI : Lalrinchhana, F. Zosangliana, Lalhmunmawia, Lalbiaknunga, Lalfakzuala, Lalramtharmawia, F. Lalrinpuia, Laltanpuia Ralte, Lallawmzuala, Lalbiakhlua, Lalruatpuia.
Chhinga Veng FC XI : Zothanmawia, Laldampuia, Zosangliana Sailo, Malsawmfela, Ramfangzauva, MS Dawngliana, R. Lalawmpuia, R. Laldinliana, Lalrammuanpuia, Lalrinchhana Tochhawng, R. Malsawmtluanga.
Lalsangzuala Hmar enkawlna hnuaiah Chhinga Veng FC hian player an dapkhawm tha hle a, kumin MFA Super Cup leh I-Day an chawi a, MPL6-ah pawh hian team tha ber pakhat an rawn ni ngei dawn niin a lang. Team hnihte hi kumin I-Day ah khan an inhmachhawn tawh a, khami tum khan 5-1 laiin Chhinga Veng FC hian hnehna an chang.
Goal hmasa ber hi 21 mins-a lut a ni a, Zosangliana ball vawrh tha zet chu F. Rinpuia chuan box chhungah lalutin goal a khung ta, Mizoram Police FC chuan goal an khung hmasa tlat mai. Chhinga Veng FC-in an nawr let nghal vat. First half hun tawp dawn minute 6 chhungin Chhinga Veng FC chuan goal hnih an thun thawt.
Sawmfela ball pek tha zet chu Dampuia chuan goal-ah chantirin Chhinga Veng FC siphurh 39 mins-ah a rul a, first half tawp dawn tak takah Chhinga Veng FC chuan corner hlawhchhuakin, Dampuia corner pet chu Malsawmfela chuan a tauh goal, half time a nih chuan Chhinga Veng FC chuan an lehthal der mai.
Second half tan atangin Chhinga Veng FC chuan game an thunun nghal, 68 mins-ah mual veilam sir atanga Malsawmfela ball vawrh tha zet chu R. Malsawmtluanga chuan a tauh goal. Hun tawp dawn tak tak 90+3 mins-ah R. Malsawmtluanga free kick chu Malsawmfela chuan tauh goal lehin, 4-1 in Chhinga Veng FC chuan hnehna an chang a, Mizoram Premier League season 6 table hmahruaitu an ni ta nghal a ni.
Mizoram Police FC hian V. Laltanpuia an chhawr thei lova, ani hi khel selang chuan hetiang em em hian an insawp kher lo maithei. Hetih lai hian Chhinga Veng FC hi an tha em a, second half-ah Rinchhana, Khawpuimawia leh Shalomlala te an la dah lut deuh deuh a, anni pathum hian second half game nasa takin an sawi danglam a ni.
Goal 5 a luh bakah hian chance hlauhawm tak tak he match-ah hian a awm nual a, Dampuia shot tha zet chu Mizoram Police FC goalkeeper Tanpuia'n a dan sak, Chhinga Veng FC tan Dawngtea pawhin goal a khung teuh hle a, Mizoram Police FC goal bar a pet per dawp nghe nghe a ni.
Mizoram Police FC pawhin goal dang khungna chance an nei bawk a, Sangbera leh Ramtharmawia shot te chu Chhinga Veng FC goalkeeper T Mawia chuan a lo dan sak ve ve. An innawr tawn zak zak a, game hmuhnawm tak a ni chiang e.
Mizoram Police FC hian Setember ni 7, Ningani tlai dar 3:00-ah Bethlehem Vengthlang FC an hmachhawn leh ang a, Chhinga Veng FC hian September ni 8, Zirtawp tlai dar 3:00-ah Chanmari West FC an hmachhawn thung ang.
Reporter : PC Lala