Zanin zanlai dar 1:15-ah Chelsea chuan Stamford Bridge-ah Barcelona an mikhual dawn. Team hnihte hi Champions League-ah lo inhmachhawn tawh thinin kum 2009 semi final 2nd leg phei kha chu vawiin thlenga sawi hlawh a la ni chhunzawm zel.
Champions League Round of 16 1st leg hi Stamford Bridge-ah khelh hmasak a ni dawn a, Barcelona hi tun season-ah an chetha hle a, an match hnuhnung 31-ah hneh loh an tawng lo, club record thar siam tumin Chelsea an hmachhawn dawn. Barca hi tun dinhmunah treble thei dinhmunah an la ding mek e.
League-ah Barca an chetha hle a, pahnihna Atletico Madrid chu point 7 laiin an tlansan mek. Hetih lai hian Chelsea erawh tun hnai game-ah an chefuh hleithei lova. January thla khan EFL Cup semi final atangin Arsenal chuan an thehchhuak a, chumi hnuah Bournemouth leh Watford te chu league-ah an hneh lo zui bawk.
Competition hrang hranga an inhmachhawn hnuhnung 12 atangin Chelsea hian vawi li hnehna an chang a, hetih lai hian Barca hian Stamford Bridge an tlawh hnuhnung vawi 6 atangin hnehna vawi khat chiah an la chang a, goal chhuah loh tum hi vawi khat chiah an nei bawk.
Blues hian Champions League game-a Barcelona an hmachhawn hnuhnung 7 atangin chak loh an la nei lova, vawi hnih hnehna an chan bakah vawi nga an inhnehtawkpui a ni.
Chelsea hian 2013/14 season hnuah a vawi khat nan Champions League quarter final luh an tum leh mek a, hetih lai hian knock out stage an khelh hnuhnung match 6-ah erawh chak an nei lo thung.
Barcelona hian season li chhungin Champions League semi final vawi khat chiah an lut a, tun season Champions League-ah tlawm la nei lo club pali chiah an awm tawh, chungte chu Besiktas, Liverpool, Barcelona leh Tottenham te an ni.
Team News :
Marcos Alonso leh Ross Barkley te chuan Chelsea match hnuhnung 3 khel thei lo mahse thawhtanni khan team training an zawm a, David Luiz leh Tiemoue Bakayoko erawh an inlan theih a rinawm loh.
Barcelona centre-back Thomas Vermaelen chuan London a pan ve a, Catalan club tan a inlan theih a rinawm. Hetih lai hian Philippe Coutinho erawh Liverpool tan tun season Champions League game a lo khelh tawh avangin Barca tan a khel ve thei dawn ta lo a ni.
Conte-a'n Barcelona a huphurh emni?
Chelsea boss Antonio Conte chuan Barcelona an hmachhawn dawn avanga a mutthat loh thu a sawi mauh mai. "Kan hmachhawn tur team te hi khawvela team tha ber pakhat an ni a, Champions League title la tur pawha rinkai ber zing ami an ni.
"Chutih laiin keini pawhin team tha tak kan hmachhawn tur hi kan phur hle a, kan that zia lantirna hmanrua a ni thei dawn a ni. A nih dan tur ang thlapa khelh kan tum ang," tiin Italian coach Conte chuan a sawi.
Barcelona tana goal khung hnem ber Lionel Messi chuan Chelsea a hmachhawn hnuhnung 8-ah goal a la khung lova. "Khawvela player tha ber chungchang kan buaipui a ni. Messi hian goal khung theihna nia ngaih loh atang pawhin goal a khung thei tlat mai, a chungchang kan buaipui hi a ngai a ni," tiin Conte chuan a sawi bawk.