FA chuan Chelsea Football Club chu thubuai 74 lai a siam sak a, player lei leh hralh kawnga sum zep ṭhen an nei niin a lang a, heng te avang hian FA chuan thubuai a siam sak.
Kum 2009 leh 2022 inkar chhunga sum chet vel danah felhlel a awm tih hriat a ni a, a bik takin 2010-11 season aṭanga 2015-16 season inkar khan niin, player lei dan kawngah club neitute sum hman dan chu financial fair play bawhchhiat loh nan Chelsea hian an zep ṭhen niin a lang.
An sum dinhmun dik tak hi thuneitute hnenah an thehlut lo nia ngaih a ni a, heng hi Roman Abramovic-a hunlai kha niin, Eden Hazard, Samuel Eto'o leh Willian te an lei dan chu a felhlel nia report a ni.
Russia-in Ukraine a run avangin Abramovic kha a nihna hlih sak a ni a, American investor Todd Boehly leh private equity firm Clearlake Capital te chuan kum 2022 khan Chelsea an lei.
Anni hian Chelsea enkawltu hluite sum vawn dan chu uluk takin an chhut let a, thil felhlel a awm ngei tih an hria a, buaina nasa zawk an tawh an hlauh avangin FA hnenah an zualko ta a ni.
FA chuan Chelsea chu thubuai 74 a siam sak a, heng thubuaiah hian thiam loh an chang a nih chuan, pawisa chawi emaw, player thar lei thei loa hun eng emaw chen hrem emaw, point paihsak emawin a hrem theih dawn.
Hetih lai hian Chelsea hotute hian anmahni club neitu hluite chet dan fel lo hi FA hnenah an hrilh zawk a ni a, thil dik taka tih an duh avanga hetianga hma la hi an nih avangin hremna na tak pek an nih a rinawm loh.
Financial Fair Play leh PSR te aṭanga fihlim an tum avangin club ṭhenkhat chuan an player leina leh hralhna dik tak hi an zep ṭhen ṭhin. Club neitute lam pawhin pawisa an thehchhuak ṭhin a, heng hi club sum leh pai che velah an ziak lang lo ṭhin bawk a, hetianga an tih chhan chu sum hman dan khuahkhirtu thuneitute laka fihlim an tum vang a ni ṭhin.
Kum 2023 khan an sum dinhmun dik tak an thehluh loh avangin Uefa chuan Chelsea a lo hrem tawh a, £8.6m a chawitir. Heng thubuai hi kum 2012 leh 2019 inkara mi kha a ni.
Kum 2012 khan Chelsea chuan Lille aṭangin Eden Hazar an lei a, season 7 chhung Stamford Bridge-ah chamin, Premier League leh Europa League vawi hnih ve ve a lakpui a, FA Cup leh League Cup te pawh a chawipui.
Belgian midfielder hian game 352 aṭangin goal 110 lai a khung a, kum 2019 khan Chelsea chhuahsanin Real Madrid a pan ta a ni.
Kum 2013 August thla khan Chelsea chuan Brazilian forward Willian leh Cameroon striker Eto'o an la lut a, Willian khan game 339 aṭangin goal 63 a khung a, Blues tan trophy 5 a hlawhchhuak. Eto'o khan season khat chiah Stamford Bridge-ah hun a hmang a, Everton a pan chhunzawm ta a ni.
Chelsea neitu thar te hian a neitu hluite chet dan fel tawk lo an hmuchhuak a, hei hi thuneitute hnenah report-in, thubuai an awrh phah a, hetih lai hian hremna lian tham erawh an tawrh a rinawm loh niin BBC chuan a tarlang a ni.