Chelsea chuan PSV Eindhoven winger Noni Madueke chu £29million in an lei chhuak thei dawn.

An indawrna hi zawh fel la ni chiah lo mah se medical test nei turin Madueke hi England-ah a zinchhuak tawh a. Stamford Bridge-ah hian kum 6 daih contract a ziak ang.

Kum 20 a upa Madueke hian a youth career hi Crystal Palace-ah a tan a, hemi hnu hian Tottenham ah a lut leh.

Kum 2018 khan Spurs hi chhuahsan lehin PSV Eindhoven hi a zawm a. Hetah hian kum 2020-21 season atang khan senior team tana khel tanin, season hmasa pawh khan vawi 35 a inlanah goal 9 a thun.

PSV hian tun transfer chhung vek hian Cody Gakpo chu Liverpool lamah an lo kaltir tawh a, hemi avang hian Madueke hi hralh chhuah an la remti lo hle. Mahse, Chelsea hian lak luh tuma tan an khawh ve tlat avangin an tang zo ta bik lo a ni. 

Chelsea hian an la lut fel thei a nih chuan tun transfer chhungin £190m lai an seng tawh dawn tihna a ni a. Nikum nipui lai pawh khan £270m lai lo seng tawhin, Todd Boehly-a'n a lei hnuah £460m chuang zet an seng tawh.

Heti hian Madueke hi tun thla chhunga Chelsea player lakluh thar parukna a ni chiah dawn a; Mykhaylo Mudryk, Joao Felix, Benoit Badiashile, David Datro Fofana bakah Andrey Santos te hi an player lakluh thar te an ni.