Chelsea-in Ugarte an la dawn lo

05th June 2023, 03:06PM

Chelsea chuan Sporting Lisbon defensive midfielder Manuel Ugarte chu lakluh tum an viau a, Sporting nena an inbiakna pawh kalthui viau tawh mah se, Paris Saint-Germain an inrawlh avangin Chelsea hi an inhnukdawk leh ta zawk.

Uruguayan midfielder hian release clause a nei a, a release clause hi euro maktaduai 60 a ni. Chelsea hian a release clause bakah hian euro maktaduai 5 dang an thehchhuak a, Chelsea hian Ugarte hi an chang mai dawn niin a lang hman.

French club pawisa ngah Paris Saint-Germain chuan Ugarte hi an dawr ve tho a, PSG hian Chelsea ai hian pawisa an thehchhuak hnem zawk niin chanchinbu mite chuan an tarlang a, hei hi Chelsea inhnuhdawh chhan ber niin a lang a, Ugarte hian PSG a pan a rinawm ta hle a ni.

Portuguese club Sporting hi season thara Champions League khel tura an inpet tlin loh avangin, player hralh then an mamawh a, Ugarte chungchangah PSG hi inremna an neihpui thuai a rinawm a, Chelsea erawhin midang an melh a ngai dawn.

Chelsea hian Brighton midfielder Moises Caicedo lam an hawi dawn niin a lang a, Chelsea hian kumin January thla pawh khan kum 21 mi hi an lo dawr tawh. Thlasik bazar inkhar hnuah Caicedo hian contract thar ziak mah se, tun nipuiah Brighton a chhuahsan dawn a, Chelsea leh Arsenal te chuan an inchuh dawn nia sawi a ni.

Copyright © inkhel.com 2024. All rights reserved.