Chelsea-in Porto goalkeeper an en thlithlai

07th February 2023, 07:02PM

Chelsea chuan nipui bazar a inhawn hunah goalkeeper thar lakluh an duh niin a lang a, FC Porto goalkeeper Diogo Costa chu an en thlithlai uluk hle niin chanchinbu mite chuan an tarlang.

Chelsea scout te chuan Costa khel hi kar thum liamta chhung vel khan an enthla nia tarlan a ni a, an mit a tlung a nih chuan nipuiah Portuguese keeper hi an dawr ngei a rinawm.

Chelsea hian khawvela goalkeeper man to ber Kepa Arrizabalaga bakah, Edouard Mendy te an la kawl a, Mendy hi an lei hnuah an first choice keeper ni mah se, tunah erawh Mendy a inhliam nasat avangin Kepa hian Blues si ban nghaktu ber a ni.

Kum 28 mi Kepa leh kum 30 mi Mendy te hian Stamford Bridge-ah kum 2025 June thla thleng daih ve ve contract an la nei a, Chelsea hian nipui bazar inhawn hunah, an pahniha an hralh loh pawhin, pakhat zawk hi an hralh ngei a rinawm.

Kum 23 mi Costa hi Manchester United pawhin an ngaihven hle nia sawi a ni a, mahse United hian an goalkeeper hman lai David de Gea chu contract thar an ziahpui a nih chuan, Costa hi an dawr dawn lo niin chanchinbu mite chuan an tarlang.

Costa hi Porto academy chhuak a ni a, kum 2019 atang khan senior team-ah hian a awm tawh a, 2021-22 season khan Primeira Liga Goalkeeper of the Season atana thlan a ni.

Copyright © inkhel.com 2024. All rights reserved.