Chelsea chuan Brighton & Hove Albion atangin Joao Pedro an la lut fel ta a, kum 2032 thleng atan contract an ziahpui.

Kum 23 mi manah hian Chelsea chuan £50million ($68.5m) vel an thehchhuak a, Newcastle United te pawhin Pedro hi duh viau mah se, amah hian Stamford Bridge pan a duh zawk avangin Chelsea hian an la thei ta a ni.

Joao Pedro hian United States lamah a team-mate thar te a zawm dawn a, Chelsea hian Club World Cup quarter finals an lut a, Palmeiras an hmachhawn dawn. Hetah hian Pedro chu inkhel ve nghal thei turin a inbuatsaih dawn nia report a ni.

"Inremna tha tak kan nei thei a, kan club tan chuan a hlawkthlak khawp mai. Sum thahnem tak kan lak luh theih phah a.

"Tin, Joao hian season tharah Champions League khelh theihna hun tha a nei dawn a, World Cup lo awm turah pawh Brazil team-a tel theihna hun remchang a nei thei dawn a ni," tiin Brighton head coach Fabian Hurzeler chuan a sawi.

Brazil international hi tun nipui bazar inhawn laia Chelsea-in player an lak luh pahnihna a ni a, Ipswich Town atangin Liam Delap an la lut tawh a, Winger Jamie Gittens pawh Dortmund atangin an la lut fel thei tep tawh. 

Tin, a hmaa inremna an lo neihpui tawh Dario Essugo, Estevao, Mamadou Sarr leh Kendry Paez te pawhin tun nipuiah hian Chelsea an zawm thei dawn bawk nia report a ni.

Joao Pedro hian kum 2023 khan Watford atangin Brighton a pan a, Brighton tan game 70 a khel hman a, goal 30 a khung bakah assist vawi 10 a nei bawk.  Season liamta khan Premier League game 27 atangin goal 10 a khung bawk a ni.