Bayern Munich-in Christopher Nkunku an duh a, Chelsea hian an hralh dawn a nih chuan a manah £65million vel an chhiar dawn niin The Athletic chuan a tarlang.

Chelsea chuan kum 19 mi Mathys Tel chu Bayern Munich atanga lak chhuah dan an ngaihven ve mek a, Bayern Munich pawhin kum 27 Nkunku lak dan an dap ve bawk a, player pahnih te hi inthleng tawn anga kalpui erawh niin a lang lo.

Chelsea chuan France international hi hralh an pawiti lo niin The Athletic chuan an tarlang a, an hralh dawn a nih chuan, add-ons leh bonus tih vel telh nual an duh lo a, man to pangngai taka hralh an duh dawn nia report a ni.

Chelsea khan kum 2023 khan RB Leipzig atangin Nkunku hi £50m-in an lei a, kum 2022 October thla khan pre-contract an ziahpui tawh bawk a, tunah hian Stamford Bridge-ah kum 4 hun a la nei a ni.

Nkunku hian Chelsea-ah inkhelhna hmun a chang tam lo hle. Tun season Premier League-ah vawi 3 chiah inkhelh bul a ṭan. Hetih lai hian competition hrang hrangah tun season chhungin Nkunku hian goal 13 a khung tawh a, Chelsea player zingah goal khung tam lamah chuan Cole Palmer chiah a phak lo.

Ligue 1-a a khelh laiin Nkunku hian League title leh French cup 2 a la hman a, kum 2019 khan RB Leipzig a zawm.