Chelsea chuan Kai Havertz-a goal khat hmangin Newcastle United kaltluang lai an titawp a, buaina karah point thum pawimawh tak dang Blues hian an hlawhchhuak.

Chelsea hian Newcastle hi an lo mikhual a, Havertz hian hun tawp dawnah Chelsea chakna goal hi a khung a, Chelsea hian Premier League game kaw chhung tlawm tawh lo Newcastle chu Stamford Bridge-ah an lo tlawm.

Havertz hian Chelsea tana a game hnuhnung pasarihah goal ruk a khung a, Thomas Tuchel-a hnuaiah goal 15 khung tawhin, Tuchel-a hnuaia Chelsea player goal khung hnem ber a ni bawk.

Chelsea hian an dinhmun sawhnghetin pathumnaah an awm zel a, khelh 28 atangin point 59 an hlawhchhuak tawh. Newcastle hian khelh 28 atangin point 31 an nei tawh a, 14-naah an awm ve mek thung a ni.

Chelsea 1-0 Newcastle United

(Havertz 89’)

Player Ratings

Chelsea an khel tha lova, kumina an khelh that loh ber tum tih theih a ni a, 75mins thleng shot on target an nei lova, club-in buaina a tawh mek chuan player-teah pawh eng emaw chenah nghawng a nei ve niin a lang.

First half-ah chance sawi tur a tam lova, chance an neih chhunah Newcastle chance a hlauhawm zawk hret niin a lang a, Dan Burn chuan goal-ah ball tauh luhna chance tha tak a hlah a, Miguel Almiron-a shot tha tak chu Chelsea goalkeeper Edouard Mendy chuan tha takin a lo save bawk.

Second half-ah team hnihte’n penalty hlawhchhuah an inbeisei ve ve a, Trevoh Chalobah chuan an box chhungah Jacob Murphy a titlu a, mah se referee-in penalty pekna turah ngai lovin, Newcastle keeper Dubravka chuan Timo Werner chu box chhungah a titlu bawk a, hei erawh Werner hi a offside avangin penalty pek theih a ni lo.

Goal awm lovin Blues leh Magpies te hi an inhnehtawk tawh dawn emaw tih hnuah 90mins hma chiahin goal pawimawh tak a lut a, midfield atangin Jorginho chuan Newcastle box-ah tha em emin ball a vawrh lut a, box chhung dinglam hretah Havertz chuan nalh taka lo lain goal-ah a khung zui bawk a, inkhela goal awmchhun a lut. Havertz hian injury time-ah chance tha lutuk a nei leh nghal a, mual dinglamah ball khalhin, box chhungah a cut lut a, a shot chu Dubravka-a’n lo nam per sakin ball in cross bar a per.

Chelsea hi an Premier League game hnuhnung pangaah an chak vek a, tunkar Nilaini zanlaia Lille tlawh turin an puahchah leh nghal dawn a, Champions League Round of 16 second leg inkhel a ni a, Chelsea hian si hnih faiin hma an hruai sa a ni.

Newcastle hi an league game hnuhnung pangaah vawi thum an chak a, vawi khat tlawmin vawi khat draw an nei bawk a, tunkar Ningani zanlai hian Everton an tlawh dawn a ni.