Chelsea chuan Mathys Tel lak dan a awm mial lo maw tiin Bayern Munich an dawr mek niin The Athletic chuan a tarlang.

Premier League club hian German Club hi an be pawp tawh a, hetih lai hian Bayern lam pawhin Christopher Nkunku an lo duh ve tho a, inthleng tawn tur ang zawng erawh chuan an indawr lo thung.

Kum 19 mi Tel hian Stamford Bridge a pan dawn leh dawn loh hi sawi chian theih a la ni lo, indawrna an kalpui ṭan chauh a ni.

Kum 27 mi Nkunku pawhin Chelsea chhuahsan a chak ve tho niin media te chuan an tarlang a, kum 2023 June thla khan RB Leipzig aṭangin Nkunku hian Chelsea a zawm a, kum 6 chhung atan contract ziak mah se, Blues-ah inkhelhna hmun a chang tam thei lo.

Tun season Premier League-ah vawi 3 chiah inkhelh bul a ṭan. Hetih lai hian competition hrang hrangah tun season chhungin Nkunku hian goal 13 a khung tawh a, Chelsea player zingah goal khung tam lamah chuan Cole Palmer chiah a phak lo.

Ligue 1-a a khelh laiin Nkunku hian League title leh French cup 2 a la hman a, kum 2019 khan RB Leipzig a zawm.

Kum 19 mi Tel pawh hian Bayern Munich-ah inkhelhna hmun a chang tam bik lo. Tun season competition hrang hrangah FC Bayern tan game 7 chiah a la inlan a, goal pawh a la khung lo.

Hmatawng lamah erawh hmun hrang hrangah a chhawr theih thung a, Rennes aṭangin German Champions vawi 33 ni thei Bayern Munich hi a zawm a, league game 59 a khel ve tawh.

Kum 17 mi a nih lai khan Bayern-in 5-0 laia Viktoria Cologne an sawp ṭumin goal a khung a, FC Bayern tana goal khung thei naupang ber niin, Jamal Musiala record a khum a ni.