Inrinni khan Chelsea chuan kum 17 mi Ishe Samuels-Smith chu Everton atangin an lak luh thu an puang.

Teenager talent nei tha tak Ishe Samuels-Smith man hi 4 Million pounds vel nia report a ni a, Chelsea-ah kum thum chhung atan contract a ziak.

English left back hi nikum November thla khan a vawi khat nan Senior team-ah telh a ni a, Carabao Cup-a Bournemouth an hneh loh tum khan bench-ah hun a hmang. Tin, April thlaa Fulham an hneh loh tumin senior team-ah telh a ni bawk.

Everton atanga Chelsea a zawm hnuin Ishe Samuels-Smith chuan, "Min barakhaih khawp mai, a chhan chu indawrna hi a rang deuh teh thut lutuk a, he hmun ka pan thei hi ka lawm khawp mai.

"Club lian ka pan thei hi tawnhriat lamah pawh nasa takin hma ka sawn phah dawn. Ka tan chuan chona thar a ni dawn a, player tha tak tak Chelsea-ah hian an awm a, rang taka insiamrem ka tum dawn a ni," tiin a sawi.

Samuels-Smith hi Manchester-a piang a ni a, kum 9 mi a nihin Everton academy a zawm a, Everton Under 18 leh Under 21-ah te a inlan chho a ni.

England Under 15, Under 16 leh Under 17-ah te a tel chho bawk a, Under 17 European Championship zawh takah pawh khan English player zinga, UEFA Team of the Tournament-a lang thei awmchhuan a ni.

Samuels-Smith hi tun nipui bazar inhawn laia Chelsea player lak luh 5-na a ni a, Christopher Nkunku, Nicolas Jackson, Diego Moreira leh Alex Matos te chu Stamford Bridge-ah a zui lut ve ta a ni.