Chelsea chuan Barcelona aṭanga Fermin Lopez lak chhuah dan a awm leh awm loh an ngaihven mek a, hetih lai hian club leh club erawh an lan indawr lo niin The Athletic chuan a tarlang.

Premier League club hian Fermin Lopez-a agent an bia a, Barcelona-a hmun a chan tam loh avangin Blues chuan Lopez hi lak chhuah theih mai an inring deuh a ni.

Kum 22 mi Lopez hian nikum October thla khan Barcelona-ah contract thar a ziak a, a contract hian kum 2029 thleng a daih. He a contract-ah hian kum 2 dang atana pawhsei theihna a tel bawk a ni.

2024-25 season ṭan a nih khan a inhliam a, kha vang khan thla khat chuang a chawl. A lo kir leh hnuah Barcelona tan season liamta khan game 46 a khel a, hetih lai hian a game khelh tam zawk hi bench aṭanga a luh te a ni hlawm. Season liamta khan goal 8 a khung a, assist vawi 10 a nei bawk. 2024-25 season tawp lam game hnuhnung 5 aṭangin goal 3 a khung a, La Liga title an hlawhchhuak a nih kha.

Kum 12 mi a nih laiin he midfielder hian Real Betis aṭangin Barcelona a zawm a, La Masia-ah inzir chhoin, 2022-23 season khan loan-in a khel chhuak a, Xavi khan inkhelhna hmun a siamsak a, Xavi-a hnuaiah game 43 a khel a, goal 11 a khung.

Tun nipui bazarah hian Chelsea chuan player 6 an la lut tawh a, Dario Essugo chu Sporting CP atangin an la a, ani hi midfielder an lak chhun a ni a, midfielder Kiernan Dewsbury-Hall, Carney Chukwuemeka leh Lesley Ugochukwu te an thehchhuak mek bawk.

Lopez hi kum 2024 June thla khan Spain tan a inlan ṭan a, ram tan vawi 1 chiah a la inlan a ni. Flick chuan midfielder a nei nual, Pedri, Frenkie de Jong, Dani Olmo, Marc Casado leh Gavi te a nei. Tin, kum 18 mi, khup hliam avanga rei tak chawl tawh Marc Bernal pawh a lo kir leh mek a, heng te a nih avang hian Lopez-a tan Catalan club-ah hmun a tam lo a ni.