Inrinni zan Premier League inkhelah, Chelsea chuan Everton an lo mikhuala, 2-2 in team hnih te hi inhnehtawkin, point 1 ve ve an hlawhchhuak.
Stamford Bridge-ah hian Chelsea tan Joao Felix leh Kai Havertz te chuan goal an khunga, Everton tan hian Abdoulaye Doucoure leh Ellis Simms te chuan goal an khung ve bawk.
Chelsea hian khelh 27 an khelh hnuah point 38 neiin, 10-naah an la awm chhunzawm zel a, Everton hi 15-naah awmin, khelh 28 atangin point 26 an hlawhchhuak tawh a ni.
Inkhel a hmuhnawm a, first half-ah clear chance tam lo mah se, chance kan hmu hnem a, Chelsea an khel tha in an khel a mawi viau. Chelsea hi first half-a inkhel thunun zawk ni mah se, first half-ah hian goal a lut lo.
Chelsea chuan second half an tan hnu lawkah chance an nei nghala, veilam atanga cross ball lo kal chu Kai Havertz chuan lo tauh mah se, Everton goalkeeper Jordan Pickford chuan harsatna liantham awm lovin a lo man. Chelsea hian second half a minute nga chuang hret an khelhin goal an khunga, Enzo Fernandez chuan Everton box pawn veilama awm Ben Chilwell-a tan ball tha zet a vawrh a, Chilwell hian lo cross nghalin, Michael Keane chuan an box pawn hretah ball a clear a, hei hi Felix chuan goal ah petin, ball hian post chhunglam perin goal ah a lut a, Chelsea in si khat faiin hma an hruai.
69mins ah Everton in an si phurh an rul a, corner atanga ball vawrh luh chu James Tarkowski-a'n a tauh hnuah, Doucoure chuan hnai set sawt atangin goal ah a lo tauh lut ve leha, Havertz chuan ball hi pet chhuak leh mah se, line a pel hman a, 1-1 a ni. Rei a ral leh hmain Reece James chu box chhungah Ben Godfrey-a'n a titlu a, Chelsea in penalty an hlawhchhuak. Havertz chuan penalty spot atang hian Pickford a bum a, a vawi hnih na Chelsea in hma an hruai.
Chelsea hian hun tawp dawn thleng hma an hruai a, mahse Everton hian 89mins ah an si phurh an sut. Simms chu box pawn lawkah ball pek a ni a, Kalidou Koulibaly a paltlang hnuah, box chhung veilam atangin goal ah ball a pet lut a, Premier League-a a goal hmasa ber Simms hian a thun. Chelsea hian injury time ah goal khung an tum hle a, Everton nawr viau mah se goal a luh belh tawh lova, 2-2 hian inkhel a tawp.
International break a awm dawna, international break atanga an rawn kir hunah, Chelsea hian Aston Villa an mikhual dawna, Everton hian international break zawhah Tottenham an mikhual ve thung dawn a ni.
