Enzo Fernandez chu a tum loh deuhin a inpal buai ta hle. Copa America-a an champion tuma a chet dan chu Chelsea lamin an chhui zui dawn a, a tul dan anga hma lak an tum thu Chelsea chuan an tarlang.
Thawhtanni zing khan si khat faiin Colombia an hneh a, Copa America-ah an champion leh. An champion hlim hian Argentina player te chu dressing room lamah an zai, 2022 World Cup final-a France player te tih elna hla ngei chu an sa ve.
He an khawsa lai hi Enzo Fernandez chuan instagram lamah a live a, an hla thu chu, "France tan an khel ve mai a ni, an nu leh pa te chu Angola atanga lo kal te an ni. An nu te khua chu Cameroon a ni a, an pa te khua chu Nigeria a ni, mahse French passport an nei tlat," tih a ni.
FFF president Philippe Diallo chuan FIFA leh Argentina Football Association hnehah an lawm lohna an thlen bawk a, Philippe Diallo chuan Argentina player te chet dan hi na takin a dem a, pawm zam theih a nih loh thu leh, chi inthliarna lam thil a nih thu a sawi.
He an live foogate-ah hian Enzo Fernandez chu a lang chiang ber a, midang erawh an lang chiang lo thung. Chelsea-a a khelhpui Malo Gusta, Fofana leh Disasi te an lawm lo hle a, instagram lamah Enzo hi an unfollow nghal hmak bawk. Tin, Enzo chhanletna ni tur a ngaih Fofana chuan twitter lamah thu a ziak a, "Kum 2024-ah chi inthliarna hi football-ah chuan a leng tawh tur a ni lo," tiin a tarlang.
Enzo hian a chet dan avangin ngaihdam a dil nghal vat bawk a, "Instagram lama ka video post chungchangah khan ngaihdam ka dil e. Kan hla sak kha midang tana ngaihthlak nuam lo a ni tih ka hria a, pawmzam theih a ni lo.
"Kei pawhin inthliarna lam hi ka duh lo zawng a ni a, video-a kan lan dan kha ka nih dan a ni lo, thinlung takin ngaihdam ka dil e," tiin.
Chelsea chuan, "Chelsea football club chuan khatiang chet dan kha a pawm thei lo a, kan club-ah hian mi chi hrang hrang, hnam hrang hrang kan awm khawm a, hei hi kan inchhuanna a ni.
"Kan player-in mipui hmaa ngaihdam a dilna chu kan hriatpui a, zirlai zirtur a nei a ni. Kan club chuan kan chhungkuaah hemi chungchang hi kan ngaihtuah chho mek a ni," tiin thuchhuah an siam.