Chelsea chuan Manchester City in lakluh an tum, Brighton defender Marc Cucurella chu lo ‘hijack’ an tum niin The Athletic leh chanchinbu mi thenkhat te chuan an tarlang.

Premier League champion Manchester City hian Cucurella hi pound maktaduai 30 in dawr tawh mah se, Brighton-in an lo hnar a, Brighton hian an defender manah hian pound maktaduai 50 an duh.

City hian Cucurella manah hian pound maktaduai 50 thehchhuah an tum loh avangin, Brighton hian City nena an indawrna an titawp tawh nia sawi a ni.

Chelsea an rawn lang ve leh mek a, Chelsea hian Cucurella manah hian sum fai bakah an defender Levi Colwill chu an thehchhuak niin chanchinbu mi te chuan an tarlang.

Chelsea hian Brighton hi Cucurella chungchangah inbiakna an neihpui mek tawh a, club hnih te indawrna a kal zel dan hi tun dinhmunah sawi belh tur a la awm rih lo.

Cucurella hian City-in an dawr hnu khan Brighton hnenah chhuah a dil tawh a, mahse Brighton hian kum 24 mi hi pound maktaduai 50 aia tlawma chhuah tir an tum lo bur thung a ni.