Chelsea chuan an midfielder Ross Barkley chu, inremna an neihpui hnuah a contract an titawp a, English footballer kum 28 mi hi free agent a ni.

Barkley hian kum 2018 January thla khan Everton chhuahsanin Chelsea hi a zawm a, Chelsea-ah hian kum nga leh a chanve daih contract ziak mah se, kum li hnuah a inpu chhuak ta a ni.

Stamford Bridge-a hun a hman chhungin, Barkley hian FA Cup leh Europa League te chawi mah se, a inkhelh hmun a chang mumal thei meuh lova, kum 2020-21 season khan Aston Villa-ah loan in a khel a, season hmasa khan Chelsea-ah hun a hmang tluan thung.

Kum 2018-19 season kha Chelsea tana Barkley inkhelh rim ber season a ni a, hemi season hian Blues tan vawi 48 inlanin, goal 5 a khung.

Barkley hi Scottish club Rangers-in an ngaihven mek a, free agent a nih takah chuan club dang pawhin an dawr a rinawm a, a input luhna tur erawh sawi theih a la ni rih lo.

Barkley hi Everton academy chhuak a ni a, Everton atang hian Sheffield Wednesday leh Leeds United-ah te loan-in a lo chhuak tawh a, a ram England tan vawi 33 inlan tawhin, goal 6 a khung tawh a ni.