Chelsea chuan Bayer Leverkusen winger Leon Bailey an dawr niin, Bailey-a agent chuan a sawi.

Chelsea hian thlasik bazar hun intan tirhin Borussia Dortmund atangin American winger Christian Pulisic an lalut tawh bawka, winger dang zawn belhin Bailey chu an mi duh niin a lang.

Bailey-a pahrawn leh a agent ni bawk Craig Butler chuan Chelsea bakah hian a fapa chu Real Madrid pawhin an dawr niin a sawi tela, Chelsea leh Real Madrid bakah hian Bailey duhtu hi club dang pahnih an awm bawk niin a sawi.

Butler chuan, “ Chelsea chuan Bailey hi an dawra, Bailey dawrtu hi club pali an awm a, Real Madrid leh Chelsea bakah Atletico Madrid leh Roma-te pawhin an dawr. Heng club pali te hian tun hnaiah Bailey a khel tlem chho chu mak an ti a, ani anga player tha bench-a a thu fo mai chu hriatthiam harsa an ti,” a ti.

Heiko Herrlich-a enkawlna hnuaiah Bailey chu tun season-ah a khel tlem hle a, mahse Leverkusen chuan Herrlich hi tun hnai mai khan an ban. Butler chuan Herrlich-a hnuaiah a fapa chuan hma a sawn loh thu leh, manager thlak a nih chu a lawm thu a sawi.

Butler chuan, “Thil a inthlak danglam ta hi ka lawm a, a chhan chu Bailey kha Herrlich-a hnuaiah hma a sawn lo a ni. Bailey-a tan hi chuan nuam ti taka football khelh a pawimawh ber rih a, Germany-ah amahin a khawsa a, a chhungte erawh Jaiamaica-ah an awm avangin a hlim loh chuan a tan thil a harsa em em a ni,” a ti bawk.

Kum 21 mi Bailey hi Genk leh Leverkusen tan bak senior level-ah a la khel lova, kum 2017 khan Genk atangin Leverkusen hi zawmin, a manah Leverkusen hian euro maktaduai 20 an seng a ni.