Armando Broja chuan January thlaah Chelsea a chhuahsan dawn anga sawi tam viau mah se, Chelsea chuan an striker hi thlasik bazar laia hralh tumna an nei lo tih Football Insider chuan a tarlang.

London club dang Fulham chuan Broja hi lakluh an duh niin chanchinbu mite chuan an tarlang a, Cottagers hian thlasik bazar inhawn hunah kum 22 mi hi dawr an tum nia tarlan ni mah se, an hlawhtlin a rinawm loh hle.

Hliamin a tlakbuak bawk nen Broja hi tun season-ah a inkhel mumal lo hle a, Chelsea tan hian competition hrang hrangah game 7 bak la khel lovin, goal 1 bak a la khung lova, vawi khat bak inkhel bul tan a la nei lo.

Season hmasa pawh khan Albania international hi a vanduai tawh a, a khup hliam avangin 2022-23 season tam zawk kha a inkhel thei lova, a inkhelh tam theihna tur lama a chhuah mai a rinawm laiin, Chelsea hian season laklawha hralh an tum lo hle niin a lang.

September thla mai khan Chelsea hian Broja hi kum 2028 June thla thleng daih contract an ziahpui a, Broja hi a chhuak a nih pawhin tun season zawha a chhuah a rinawm chauh a, loan bakin Chelsea hian an chhuah tir a rinawm loh bawk a ni.