Ukraine leh Chelsea striker hlui Andriy Shevchenko chuan, Chelsea forward Mykhaylo Mudryk chu Chelsea-in an dawh theih a ngai tih a sawia, Mudryk hi career bul tan tir, nakina la tha tur a nih thu Shevchenko hian a sawi bawk.

Chelsea hian kumin January thla khan Ukrainian winger Mudryk hi Shakhtar Donetsk atangin an lei a, a manah pound maktaduai 89 ngawt seng mah se, Mudryk hian beisei a la pha lo hle. Kum 22 mi hian Chelsea a zawm hnuah Premier League game 6 a khel tawh a, assist pakhat nei tawhin, goal erawh a la khung lo.

Shevchenko chuan Mudryk-a chungchang sawiin, “Chelsea hian player talent nei tha tak an lei a, mahse a la naupan viau laiin an lei. Football career lian taka bul tan tir chauh a ni a, Chelsea a zawm hi kawng dik a zawhin ka hre bawk.

“Chelsea hian hmachhawp pui tak an nei a, nakin atan Chelsea hian tunah sum an seng lawk tih a lang. Tuna Chelsea in Mudryk an lei hi a talent neih an rin tawk zia a langa, hun rei daih contract a nei a, thil thleng zen zen a ni lo. Chelsea hi nakin atan an in lei lawk a ni.

“Premier League-ah chuan chet that nghal a ngai fo thin a, mahse kum riat lo awm leh turah hian a chet dan kan en dawn a, nakin zela a tih theih kan en a ngai. A club hi a lakah an dawh theih a ngai a, a talent neih hi an rin tawk a ngai a ni,” tiin a sawi.

Shevchenko hian kum 2006 khan Chelsea hi AC Milan atangin a zawma, Chelsea hian a manah pound maktaduai 30 sengin, a hun laia Chelsea player man to ber a ni nghe nghe. Europe-a striker hlauhawm ber zinga mi ni thin Shevchenko hi Chelsea-ah hian beisei a pha bik lova, Chelsea-a season hnih a awm chhungin goal 22 bak a thun lo a ni.