Chelsea chuan Villarreal striker Nicolas Jackson an la lut hnai niin English media te chuan an tarlang.

Kum 21 mi Senegal international leh Chelsea chuan thuin inremna an nei tawh a, a fee chungchang an sawi ho  mek nia tarlan a ni. Nicolas hian La Liga game a khelh hnuhnung 8 atangin goal 9 a khung.

Jackson-a contract hian release clause £30m bawr vel a keng tel a, Chelsea chuan instalment-a pek tumin inbiakna an neihpui mek niin thuchhuah thenkhat chuan an tarlang. Villarreal lam pawhin installment hi an hnial hran lo a nih hmel.

An indawrna a kal tluan chuan Jackson chu Mauricio Pochettino era-a Stamford Bridge-a an player lak luh hmasak ber a ni thei dawn.

He forward hi Chelsea-in an ngaihven nia report a ni chiah lo a, Blues chuan striker thawm nei lian deuh Victor Osimhen leh Harry Kane-te an hel hmasa. Mahse club recruitment team lam chuan Jackson hi an hmu fuh hlauh a, rang taka inbiakna neihpui nghal nia report a ni. 

Chelsea hian Osimhen chu an la awt reng tho a, mahse Napoli lamin £100m bawr vel lai an chhiar avangin inbiakna an kalpui hleithei lo.

Pre-season a Pochettino-a mit lak tum striker naupang tak tak zingah Jackson chu a tel ve dawn a nih hmel. Academy graduate Armando Broja pawh na taka a khup a tihhliam hnuah a lo kir leh tawh a, January-a an lak luh David Datro Fofana pawh regular taka inkhelh ve tumin hma a la dawn.

Arsenal leh Bayern Munich-in an hel mek Kai Havertz-a hma hun hi a la chiang lo a, Chelsea chuan la kawl chhunzawm duh viau mah se pawisa an mamawh. 

Pierre-Emerick Aubameyang pawhin Saudi Arabia lam atangin ngaihventu a nei a, Romelu Lukaku pawhin Middle East lam atangin ngaihventu a nei bawk.