Jorrel Hato chungchangah Chelsea leh Ajax te chuan inremna an nei ta a, Chelsea hian €40million vel an thehchhuak a, hei hi Ajax chuan an lo pawm ta a ni.

Kum 19 mi, Netherlands international hian kum 7 chhung atan Stamford Bridge-ah contract a ziak ang a, Ajax chuan London pan an phalsak ta bawk a ni.

Hato hian a naupan laiin Sparta Rotterdam-ah hun hmang mah se, Ajax academy chhuak a ni kan ti thei awm e. Ajax senior team tan game 111 a khel hman a ni.

Left-back a ni a, centre back-ah pawh a khel thei bawk a, Marc Cucurella, Malo Gusto, Levi Colwill, Benoit Badiashile, Trevoh Chalobah leh Wesley Fofana te nen hmun an inchuh dawn a ni. Ram tan Hato hi vawi 6 a inlan ve tawh a, youth level-ah erawh a inlan hnem hle. 

Tun nipuiah hian Chelsea chu bazarin an buai hle a, Liam Delap, Joao Pedro leh Jamie Gittens te an la lut tawh a, contract an lo ziahpui tawh Estevao Willian, Dario Essugo, Mamadou Sarr leh Kendry Paez te chuan an zawm bawk.

Tin, an goalkeeper pahnih Kepa Arrizabalaga leh Djordje Petrovic te an thehchhuak a, Noni Madueke chu Arsenal lamah an kaltir a, Joao Felix pawh Al Nassr lamah an kaltir bawk.

Hato hi defender naupang zingah Europe-a hot ber pakhat a ni a, season hnih chhung chu Ajax tan tha takin a khel a ni.

Ajax academy chhuak niin, thiamna leh theihna sang tak a nei a, ball a ken hian a inringtawk em em. Ani a khelh hi chuan ball possessions-ah an tha ziah a, inkhelh an thunun phah thin a ni.

Tin, ball tlanpui hi nuam a ti hle bawk a, a passing a tha em em bawk, hla tak takah pawh tha tak takin ball a dah thei a ni.

Season liamta khan full-backs zingah PSV Eindhoven defender Richy Ledezma chiah passing-ah a phak lo a ni.

A kum a la naupang, hetih lai hian a taksa erawh a inphut mawi tawk tawh hle a, hei vang hian a defending pawh a that phah.  Chutih laiin hmasawnna tur tam tak a la nei a, Chelsea-ah defender tha leh zual zawk nih tumin hma a la dawn a ni.