Chelsea defender thar Marc Cucurella

05th August 2022, 06:08PM

Chelsea chuan Brighton atangin Spanish defender Marc Cucurella an lakluh thu an puang a, kum ruk daih contract an ziahpui.

Chelsea hian Cucurella manah hian pound maktaduai 55 an seng tih chanchinbu mi te chuan an tarlang a, kum 24 mi contract hian kum 2028 June thla thleng a daih.

Chelsea Cucurella manah hian pound maktaduai 55 bakah, add-ons pound maktaduai 7 dang an sen belh leh bawk dawn a, Cucurella man hi pound maktaduai 62 a kai chho thei dawn a ni.

Cucurella hi Brighton player hralh chhuah tawha man to ber a ni a, nikum khan Arsenal hnenah Brighton hian Ben White chu pound maktaduai 50 in an hralh a, Cucurella hian a lehpel chiang hle a ni.

Nikum mai khan Cucurella hian Getafe atangin Brighton hi a zawm a, Seagulls tan hian game 38 atangin goal khat a khung.

Cucurella chuan, “Ka lawm hle a, khawvela club tha ber zinga mi ka zawm thei hi ka tana chance tha tak a ni. Rim takin ka thawk dawn a, theihtawpin team ka pui dawn a ni,” tiin Blues a zawm chungchang a sawi.

Tun nipui bazar chhungin Chelsea hian player panga an lalut tawh a, Cucurella bakah hian Raheem Sterling, Kalidou Koulibaly, Carney Chukwuemeka leh Gabriel Slonini te an lalut tawh bawk.

Cucurella hi Manchester City chuan lakluh tum hle mah se, City hian Brighton-in a man an chhiar zat an thehchhuak thei lova, Chelsea rawn langin, Cucurella hi Stamford Bridge-ah a inpu lut ta a ni.

Copyright © inkhel.com 2022. All rights reserved.