Chelsea chuan Ajax defender Jorrel Hato chu an la lut fel ta a, a man hi €40million chuang nia report a ni.

Kum 19 mi defender hian Stamford Bridge-ah kum 7 chhung atan contract a ziak a, a contract-ah hian sell-on clause ziah tel a ni bawk.

Hato chuan, "Ka va han phur tak em! He hmuna ka lut thei hi ka hlim hle a ni. Ka hma hun tur chungchang hi ka ngaihtuah ve nasa a, ka football zinkawngah hian bung thar kai ka duh a, Chelsea hi ka tana hmun tha ber niin ka hria a, ka hlim em em a ni," tiin Chelsea a zawm hlimin a sawi.

Netherlands international hian ram tan vawi 6 a khel ve tawh a, Ajax academy chhuak niin, senior team-ah vawi 111 a inlan ve tawh a ni.

Left-back a ni a, centre back-ah pawh a khel thei bawk a, Marc Cucurella, Malo Gusto, Levi Colwill, Benoit Badiashile, Trevoh Chalobah leh Wesley Fofana te nen hmun an inchuh dawn a ni.

Tun nipuiah hian Chelsea chu bazarin an buai hle a, Liam Delap, Joao Pedro leh Jamie Gittens te an la lut tawh a, contract an lo ziahpui tawh Estevao Willian, Dario Essugo, Mamadou Sarr leh Kendry Paez te chuan an zawm bawk.

Tin, an goalkeeper pahnih Kepa Arrizabalaga leh Djordje Petrovic te an thehchhuak a, Noni Madueke chu Arsenal lamah an kaltir a, Joao Felix pawh Al Nassr lamah an kaltir bawk.

Hato hi defender naupang zingah Europe-a hot ber pakhat a ni a, season hnih chhung chu Ajax tan tha takin a khel a ni.

Ajax academy chhuak niin, thiamna leh theihna sang tak a nei a, ball a ken hian a inringtawk em em. Ani a khelh hi chuan ball possessions-ah an tha ziah a, inkhelh an thunun phah thin a ni.

Tin, ball tlanpui hi nuam a ti hle bawk a, a passing a tha em em bawk, hla tak takah pawh tha tak takin ball a dah thei a ni.

Season liamta khan full-backs zingah PSV Eindhoven defender Richy Ledezma chiah passing-ah a phak lo a ni.

A kum a la naupang, hetih lai hian a taksa erawh a inphut mawi tawk tawh hle a, hei vang hian a defending pawh a that phah.  Chutih laiin hmasawnna tur tam tak a la nei a, Chelsea-ah defender tha leh zual zawk nih tumin hma a la dawn a ni.