Chelsea chuan manager thar an nei a, season hmasa lama Napoli manager Maurizio Sarri a ni. Sarri-a assistant tur hian London club hian an player hlui Gianfranco Zola an lalut ve leh.

Chelsea hi pre-season tour nei turin Australia an pan meka, Zola hian a zawm ve nghal a ni.

Zola chuan Stamford Bridge-a a kir leh chungchang hi sawiin, “Ka tan chuan ka lo let thei hi thil lawmawm tak a ni a, Maurizio nen hian club tana hlawhtlin ka duh a, player ka nih laia ka lo tih thin tawh angin ka theihtawp ka chhuah leh dawn a ni.” a ti.

Kum 52 mi Zola hian sawi belhin, “Ka hmaa chona awm hi ka hmachhawn chak tawh a, tha taka bul kan tan ho ka duh a kan zinkawng thar tur atan hian kan phur tlang hle a ni.” a ti bawk.

Zola hian Chelsea tan game 312 khelin goal 80 lai a khung a ni.

Premier League-ah West Ham leh Watford-te a lo enkawl tawha, Serie A lamah Cagliari a lo enkawl tawh bawk. Kum 2016 khan Birmingham enkawl lehin tum ang a an chet that loh avangin thla li hnuah a bang leh nghal a ni.