Chelsea chuan Stamford Bridge-ah Aston Villa an mikhual a, si thum faiin Blues an chak. Chelsea tan Jackson, Fernandez leh Palmer ten goal an khung.

Khelh 13 atangin Chelsea hian point 25 an hlawhchhuak a, tun season Premier League-ah vawi 7 hnehna changin, vawi 2 an tlawm a, vawi 4 an khingpui an inhnehtawkpui.

Inkhelh tan atanga minute 7-na lekah Nicolas Jackson a rawn inlar leh nghal. Mual veilam sir atanga Cucurella cross chu near post atangin a chhuih a, goal post a per hnuah a goal mawi hle. Jackson hian tun season Premier League game 13 atangin goal 8 a khung tawh a, assist vawi 3 a nei tawh bawk.

Rei an khelh hmain Watkins chuan Villa siphurh a rulh teuh hle. Goalkeeper chiah a hmachhawn tawh tihin a shot a, Chelsea goalkeeper Sanchez chuan tha takin a lo dan sak.

Minute 23-ah Tielemans ball chan lai chu Cole Palmer chuan chhuhsakin, box pawn atangin a pet a, hei Martinez chuan lo dangin, hemi hnu hian back pass a man chuih mai. Referee chuan indirect-freekick a ham, mahse hei hi Chelsea chuan goal-ah an chantir thei ta lo.

Minute 36-ah Chelsea chuan an goal hnihna an khung. Cole Palmer-a ball pek tha lutuk chu Fernandez chuan dawngin, box chhung atang chuan bottom corner-ah a chhuih goal a, si hnih faiin Chelsea chuan hma an hruai.

Second half hun tawp dawn minute 83-ah Cole Palmer chuan an goal hnuhnung ber mawi lutukin a khung. Madueke ball pek chu box pawn atangin a thuai a, top corner-ah mawi lutukin a thlawk lut. Si thum faiin Chelsea chuan hnehna an chang ta a ni.

He match-ah hian Chelsea hian goal 3 aia tam khung theihna hun tha tak tak an nei nual mai. Aston Villa pawhin chance an nei ve nual bawk a, Sanchez a chetha hle bawk.

Villa goalkeeper Martinez a inhliam palh hlauh a, Villa tan chuan a pawi dawn vawng vawng. Aston Villa chu table-ah 12-na an ni mek a, tunlai an chefuh hleithei lo. Premier League game hnuhnung5-ah chak an nei lo a, vawi 3 an chak lo a, vawi 2 an khingpui an inhnehtawkpui a ni.