RB Leipzig forward Christopher Nkunku chu January thla chhungin Chelsea chuan lakluh theih an in beisei tih 90min chuan a tarlang.

A zawna vawi thum chak tawh lo Chelsea forward thar an zawng kual nasa e mem a, an target lian ber chu Nkunku hi a ni, kumin nipui bazar inhawn lai pawh khan French forward hi medical an neih fel pui tawh tih chanchinbu mi te chuan an lo tarlang tawh a, 2023-ah chuan Frenchman hi Stamford Bridge-ah an lakluh tawh ngei an in beisei.

Kum 25 a upa Nkunku hian Leipzig-ah hian nakkum nipui atanga nung tan turin release clause euro maktaduai 58 vel a nei a, mahse Chelsea lam hian chumi hmaa lakluh chu an duh avangin a man pawh pek belh an inhuam a, an inbiak rem thuai a rinawm.

Chelsea hian nakkuma a release clause pe tla turin Leipzig hi an lo inrempui lawk dawn tihna a ni a, hetiang a nih chuan Nkunku nakkum January-ah emaw summer transfer-ah chuan EPL lamah kan hmuh ngei hmel e.

Bundesliga game 15 a goal 12 khungtu Nkunku hi RB Leipzig lam hian an la ui viau dawn tih a chiang reng a, tun season chhung chu chelh an la duh ang em tih erawh zawhna awm thei a ni.

Blues hian Nkunku chauh hi an target a ni loa, AC Milan forward tlan chak Rafael Leao leh Napoli forward Victor Osimhen te pawh Stamford Bridge-a seng luh tura an target lian tak an ni.

Tun season-ah Rafael Leao hian Serie A match 14 ah goal 6 leh assist 4 a nei tawh a, Victor Osimhen pawh hian Serie A lamah tho match 11 ah goal 9 leh assist 2 a nei ve tawh bawk.

Heng bakah hian Chelsea scout hian Brentford forward EPL game 14 a goal 10 leh assist vawihnih nei tawh Ivan Toney leh Borussia Monchengladbach's forward bawk Marcus Thuram te pawh an lakluh hual zingah hian an tel.

Kum 25 a upa Thuram, France defender hlui Lilian fapa hian Bundesliga game 15 ah goal 10 a khung tawh a, Chelsea chauh ni lo Tottenham pawhin lei tumin an thlithlai ve mek.