Enzo Fernandez chu Chelsea team-ah a kir leh dawn hnai tawh a, Copa America-a an champion hnuin Blues chuan chawlh an pe a, kar leh lamah Chelsea pre-season tour a zawm ve ang.

Copa America-a an champion hlimin French player te ngainat loh zawng tak hla an sa. Chelsea-a a team-mate Fofana phei chuan, "Kum 2024-ah hi chuan chi inthliarna hian football-ah hmun a chang tawh lo," tiin a tarlang hial a nih kha.

Chelsea-a a team-mate thenkhat ten instagram lamah Enzo hi an unfollow niin media te chuan an tarlang bawk a, Chelsea team-a a kir leh hunah hian boruak a alh phat ring an awm nawk mak.

Hetih lai hian Chelsea boss Enzo Maresca chuan engkim chinfel a nih tawh thu a sawi chhuak. Media te chuan Enzo lo kir leh hunah team chhungah harsatna a awm ang em? Tih an zawh tumin Enzo Maresca chuan, "Chutiang a thlen ka ring lo.

"Mihring vek kan ni a, tin, rilru chhe tak pu chunga khatiang ti kha a ni lo tih pawh a lang. Enzo lo kir leh hunah hian boruak duhawm loh a thlen ka ring lo, club leh player te chuan engkim kan sawifel tawh e.

"Mipui hmaah ngaihdam a dil a, club pawhin a tihtur a ti bawk. Thil eng emaw a thleng lo ang," tiin a sawi.