McDowell's No 1 Soda Mizoram Premier League Round 12-ah Chanmari Derby khelk a ni a, Chanmari FC chuan 4-1 in Chanmari West FC an hneh a, Chanmari FC hian MPL 4 semi final an khel dawn chiang ta a ni.
Chanmari FC tan Malsawmfela, Danmawia, David-a leh Lalthlamuana ten goal an khung a, 4-0 in hma an hruai, hun tawp dawn tak takah H Lallianzama chuan Chanmari West FC tan goal khat a khung ve leh hlauh a, 4-1 in Chanmari FC chuan hnehna an chang ta a, Vanlalthlamuana chu man of the match-a thlan a ni.
Chanmari FC chuan khelh 12 atangin 23 points an hlawhchhuak ta a, semi final an khel dawn chiang. Chanmari West FC erawh khelh 12 atangin point 11 chiah an la nei. Table-ah 7-na an ni mek a, MIzoram Police FC chu a mawngphah niin khelh 12 atangin 8 points chiah an la hlawhchhuak. Chanmari West FC hi relegate thei dinhmunah an la ding tlat mai.
Tin, MPL table-a 7-na hian play-off an khel leh dawn a, chu pawh chu a him lo hle bawk. Chanmari West FC hian an match hnuhnung pahnihah Aizawl FC leh Dinthar FC an la hmachhawn dawn, team tha ve ve an ni a, hnehna an chang lo ve ve a nih phei chuan an relegate hlauh maithei a ni.
Chanmari FC 4-1 Chanmari West FC
(Malsawmfela 18' pen, R. Laldanmawia 33', David Lalchhuanawma 52', Vanlalthlamuana 71') (H. Lallianzama 90'+1)
Chanmari FC: F. Lalmuanawma, Joseph Lalnunpuia, Lalhriatrenga, R. Laldanmawia, Vanlalthlamuana, David Lalchhuanawma, Lalrinchhana Tochhawng, C. Lalrosanga, Reuben Zosangpuia, Malsawmfela, Lalnunmawia
Subs: MS Dawngliana, K. Lalchhanhima, C. Vanlalhriatpuia, Lalrozama Fanai, Johny Lalfakzuala, R. Lallawmawma, Rochhingpuia, Ramngaihawma, Ramemgmawia.
Chanmari West FC: Lalruatpuia, C. Ramdinmawia, Abraham Lalringngheta, Lalnunpuia, Vanneihtluanga, Lalbiakhlua, Zion Lalramluaha, Laltlansanga Zadeng, Lalrammuanpuia, Vanlalbiaa Chhangte, H. Lallianzama.
Subs: Liansangpuia, Vanlalruata, K. Lalmuanthanga, Benjamin Lalchhuanawma Hnamte, Lallawmsanga, R. Malsawmtluanga, Lalramliana, Lalhmangaihzuala.
Goal hmasa ber hi 18th mins-a lut a ni a, Malsawmfela chuan penalty atangin goal hmahruai a khung. 33rd mins-ah Malsawmfela ball vawrh tha zet chu Thlamuana'n Danmawia tan a tauh thla a, Danmawia hian box chhung atangin chiang takin a pet goal a, tun season-ah goal 5 a khung tling ve ta a ni.
Second half 52nd mins-ah Malsawmfela chuan halfway line atangin ball a laphei a, defender pahnih a bum hnuah mual dinglam sira tlan Danmawia a pe a, Danmawia hian tuma chan loh David-a chu a pe leh a, Chanmari FC defender David-a chuan awlsam takin a pet goal a, tun season-ah goal khat a khung ve ta a ni.
71st mins-ah Vanlalthlamuana chuan goal mawi em em a khung a, box dinglam atangin a laiah a lalut a, a ke veilam chuan a thuai ta, top corner-ah a thlawk lut a, 4-0 laiin Chanmari FC chuan hma an hruai ta a, hun tawp dawn tak takah Zama chuan goal khat a tauh goal ve leh a, 4-1 in Chanmari FC chuan hnehna an chang ta a ni.
He match-ah hian Chanmari West FC lamin bul an tan tha zawk a, chance tha tak tak nei mahse goal an khung thei tlat lo. First half tawp dawna Vanlalbiaa thelhte kha an ui khawp ang le, Chanmari West FC khan an chance-te kha chhawr tangkai selang chuan chak theihna chance an nei ve tho mai, mahse Chanmari FC hmatawngte an tawrawt em a, an dang zo ta ngang lo a ni.