Neymar chuan August thla atanga chhunzawm tur UEFA Champions League title chu PSG lakpui ngei a tum thu a sawi.

Khawvela player man to ber Neymar chuan 2017 kumah khan Barcelona a chhuahsan a, Ligue 1 champion Paris Saint-Germain chu €222 million (£201 million/$248 million) zetin a zawm a. Paris khawpui lam a pan hnuah hian Europe khawmualpuia inelna sang berah a la champion pui thei lo a ni.

Coronavirus vanga inkhel an tihtawp lailawk hma khan PSG chuan Champions League last 16 an khelhah Borussia Dortmund chu 3-2 in an hneh a, Neymar chuan goal hnih a thun nghe nghe a ni.

UEA chuan tun season Champions League quarter final chin chu Portugal ramah ‘mini-tournament’ anga kalpui an rilruk a. Ligue 1 season chu an titawp hma hle a, hei vang hian season an chhunzawm leh a nih chuan PSG chu thla 6 dawn inkhel loin an awm hman dawn a ni.

Paris Saint-Germain chuan a zawnin French title chu vawi thum an la ta a, Neymar chuan hei hi a duhtawk mai lo a, Champions League trophy chu Paris khawpuia hawn theih ngei a duh a ni.

Brazil forward Neymar chuan, “Tun season chu a buai ta nuaih mai a, a pawimawh ber chu kan him tlan theih kha a ni a. Taksa leh rilru hriselna aia pawimawh hi a awm lo a ni,” a ti.

“Inkhel leh turin ka inpeih a, ka phur em em mai a. Champions League hi rilruah a lian hlur tawh mai a ni. Group khirh tak maiah kan awm a, chutiang chu kan pal tlang thei hlauh a, tun dinhmun hi kan thleng thei a ni,” a ti bawk.

A sawi zelnaah, “Kan hmabak a la thui rih hle a, theihtawp kan chhuah chhunzawm zel ang a, a tawp thlen theih kan tum dawn a. Inkhelh leh vat vat a chakawm a, khelmuala luh leh theih hun a nghahhlelhawm tawh khawp mai,” a ti.

“Pathianin rem a tih chuan Paris Saint-Germain hi bung thar kaipui ka tum a, Champions League trophy hi lakpui ngei ka tum viau a ni,” tiin Neymar chuan a sawi.