2024-25 Premier League season-a an game hmasa berah Champion lai Manchester City chuan Stamford Bridge-ah Chelsea an tlawh a, si hnih faiin Man City-in hnehna an chang a, Haaland leh Kovacic te chuan goal an khung.

Stamford Bridge-a inkhel hi a hmuhnawm hle, goal mouth action pawh a awm nual. Goal hmasa ber hi minute 18-a lut a ni a, mual veilam sir atanga Doku cross chu Haaland chuan box chhungah dawngin, Cucurrela leh Colwill te karah Haaland chuan goal a khung.

Haaland hian Manchester City tan game 100 a khel tling ta a, goal 91 khungin, assist vawi 15 a nei tling tawh bawk. Haaland goal khung hnu hian Doku chuan ama pualin goal a khung ve teuh hle, box pawn atanga a shot tha tak chu Chelsea goalkeeper Sanchez chuan a lo save.

First half tawp dawnah Jackson chuan Chelsea siphurh a rul. Box pawn atanga Cole Palmer shot chu Ederson chuan a save per a, hei hi Jackson chuan goal-ah a chhuih lut. Mahse assistant referee-in offside a phar a, VAR hmanga ennawn a nih hnuin offside nemngheh a ni.

Second half tan a ni a, Haaland chuan goal hnihna khungna hun remchang tak a nei, box chhung chiah atanga a pet chu Sanchez chuan a lo dan sak. 

Jackson chuan Chelsea siphurh a rul teuh hle bawk. Lavia tauh chu box chhung hnai tak atangin a volley, hei hi City goalkeeper Ederson chuan a lo dang hlauh. Rico Lewis chuan minute 65-ah City goal hnihna a khung, mahse Haaland a lo foul avangin goal-a pawm a ni lo.

Hun tawp dawn minute 6 a la awmin Kovacic chuan box pawn atangin kawh zetin a chhuih a, Sanchez chuan a beng chhuak zo lo, goal mawi tak a ni a, si hnih faiin Man City chuan hnehna an chang ta a ni.

Manchester City game a mawi a, champion lai an ni a, team tha ber pakhat an ni leh dawn tih a chiang. First half-ah Savinho a inlan a, a hmuhnawm kher mai. Mual dinglam leh veilam sirah duh tawkin a tal thei a, a lai lamah ball mawi tak takin a la lut bawk.

First half-ah Savinho khan chance hlauhawm vawi 3 a siam a, dribbles completed vawi 3 neiin, khingpuite nen an inchuh tumin vawi 5 a chungnung zawk a ni bawk. Alvarez an chhuahtir pawh kha a mak hran lo e.

Second half hun tawp lamah Kovacic chu box chhungah chiang takin a handball. Inkhel enkawltu Anthony Taylor chuan penalty hamna tur niin a ngai lo thung. 

Si hnih faiin tlawm mah se, Chelsea supporter te tan hnualna tur a awm lo. Coach thar hnuaiah an indinthar mek a, tun season-a an game hmasa berah champion lai City an hmachhawn nghal. Chelsea khan City an hmachhawn thei phian. Chance hlauhawm tak tak pawh an nei thei a, striker tha tak chu nei phei selang chuan goal an khung ve ngei ang. 

Maresca hnuaiah Chelsea game a pangngai hle. City ni lo team dang an hmachhawn hunah chuan an duhthusam points an hlawhchhuak zut zut maithei a ni.