Upa C Keikhuma Memorial Inter Village Football Tournament chu June ni 25, 2022 (Inrinni) khan khelh zawh niin Champhaiah Melbuk VC team an thiam ber.
Rin lawk ang ngeiin Team hnih ten 4-3-3 formation an rawn hmang leh a; Melbuk-ah Laldinpuia'n goal a veng a, tlar hnungah Lalnunmawia, Ruatsaka, Ephraim-a leh Lalnunsanga te an intlar a, Midfield-ah Rueben-a, Lalsawmzela leh Ramnunmawia te an awm a. Tlar hmaah Lallawmtluanga, Lallawmsanga leh Lalhmingthanga te an intlar bawk.
Zokhawtharah Ramchhuanpuia'n goal a veng a, tlar hnungah Lalrinchhana, Vanlalhriata, Joseph LR Sailo leh Lalhreliana te an ding a, Midfield-ah Lalnunzira, C Lalmuanpuia leh Ramengmawia te an awm a, tlar hmaah Zodinthara, Lalengliana leh Vanlalpuia te an intlar bawk.
Beisei lawk ang ngeiin Team pahnihte an inngam tawn a, Melbukin inkhel bul tan tha zawkin chance pawh an insiam hmasa zawk a, Lalsawmzela freekick chu Ramchhuanpuia'n a beng chhuak hman a, Epraim-a freekick a dang bawk. First Half chhungin Melbuk-in goal-a an shot tum li chu Ramchhuanpuia hian a dan sak a ni.
Team pahnih defender-te an khel tha dun a, clear chance an insiam thei lo ve ve. Midfield thunun zawk awm lo khawpin an inbei tawk a, Melbuk wing back Ephraim-a'n ball tha tak takin thawn lut thin mah se, Zokhawthar defender-te'n an tauh chhuak zel a, goal hlauhawm a awm thei lo.
2nd half-ah dan pangngai ang bawkin Melbuk-in goal an nawr leh a, Zokhawtharin Ist half angin awmze neiin an nawr hlei thei tawh lo. Min 70 naah Melbukin freekick sawisel theih ni a lang an hlawh chhuak a, deadball pet thiam bik Ephraim-a a rawn pen chhuak a, Wall sirah Kual mawi zetin a pet, Goal ban a per hnuah goal-ah a lut. Melbuk goal nawr a na sawt a, Melbawk Coach Lalsangzuala Hmar hian 2nd half-ah game danglam a la chhawpchhuak ziah bawk.
Min 78 naah Ephraima-a corner kick chu Lalnunmawia'n chiang zeta tauh lutin Melbukin an goal hnihna an khung. Melbukin an ze ngai chhuahin hun tawp dawn lamah goal an khung belh leh, Min 85-naah Ephraim-a corner kick chu Captain Lallawmtluanga'n tauh goal lehin Melbuk goal 3-na a khung zui leh, hun a tawp a, si thum faiin Melbuk chuan hnehna changin Upa C Keikhuma Memorial Inter Village football tournament 2022 Champion an ni ta a ni.
Goal khat khunga vawi hnih thiante pet goal tur siamsaktu Ephraim Lalremtluanga chu Man of the Match-ah thlan a ni.
Champion Team Melbuk hian Cheng Nuai 1 leh Trophy an dawng a, Pahnihna Zokhawtharin pawisa fai cheng Sing 5 leh Trophy an dawng bawk.
Best Player : Lalsawmzela, Membuk
Top Scorer : PC Lalengmawia (10 Goals) Tuipui
Best Promising Player : Stain Laltanfela, Vengthlang
Fair Play : Melbuk
Reporter : Jacob Khawlhring
Weekend Transfer News Youtube lama en duh tan pic hi click mai tur aw.
