Liverpool leh Arsenal an hmachhawn dan a hmuhnawm a, team ṭha pawh an hmachhawn thei hle tih a lang chiang. Manchester United chu Southampton an hmachhawn hunah chak tura beisei an nih tawh thu Ruben Amorim chuan a sawi.

Premier League match-ah Manchester United chuan 2-2 in Liverpool an inhnehtawkpui a, FA Cup Third Round-ah Arsenal hmachhawnin, 1-1 a an inhnehtawk hnuah leh, kim lo zawk an nih hnuah penalty shootout hmangin hnehna an chang.

Ningani zan hian United chuan Southampton an hmachhawn dawn, Premier League mawngphaha awm mek Saints hi Amorim chuan theihtawpa hmachhawn a tum thu leh, mipui lamin United chu chak tura an beisei thu a sawi tel bawk.

"Southampton kan hmachhawn huna kan game khelh turah hian ka player te inpekna a sang nge sang lo tih ka hre thei chauh dawn. Eng game nge ka khelhpui dawn tih ringawt ka ngaihtuah, naktukah kan hria ang chu.

"Kan game hnuhnung pahnihah kha chuan chak turin mipuiin min beisei lem lo. Tunah erawh chak turin min beisei ṭhup tawh dawn.

"Kan game-ah hian ngelnghetna hmuh ka duh a, Liverpool leh Arsenal kan hmachhawn dan ang bawka ṭangin Saints hmachhawn kan tum a ni, a chhan chu chak turin min beisei tawh.

"Mipui min beiseina hi min nawr kaltu atan a pawimawh dawn. Sawi tawh angin Arsenal leh Liverpool kan hmachhawn kha chuan kan chak pawh an ring hlawm lo a nih kha. Tunah chuan pressure kan nei tawh a, hei hi hnehna min chantir theitu tur a ni dawn a ni," tiin Ruben Amorim chuan a sawi.

Viktoria Plzen an hmachhawn zawh aṭang khan Marcus Rashford chu United squad-ah a tel leh tawh lo. Rashford a khelh dawn leh dawn loh zawh a ni a, Amorim chuan, "Naktuk hian chak ka duh a ni, chu chiah chu ka rilruah a awm. Hnehna min chanpui theitu tur player ṭha ber te ka thlang chhuak mai dawn a ni," tiin a sawi bawk.