Emirates Stadium-ah nge, hun rei tak kim loa khel chungin Manchester United chuan Arsenal an hneh a, FA Cup Fourth Round an lut.

Inkhelh chhung zawngin mual neitu lamin ball possessions 70% lai an nei a, United lamin 30%. Heti chung hian Amorim chuan chak an phu thu a sawi chhuak.

Bruno Fernandes chuan United tan goal a khung a, minute 61-ah Dalot hnawhchhuah a ni a, Gabriel chuan Arsenal siphurh a rul. Hun pangngaiah 1-1 in an inhnehtawk a, extra time-ah goal dang a lut lo. Penalty shootout-ah United chuan 5-3 in hnehna an chang ta a ni.

He match-ah hian Man United goalkeeper Altay Bayindir  a cheṭha hle. Hun pangngaia Martin Odegaard-a penalty a save a, penalty shootout-a Kai Havertz pet pawh a dang bawk.

United boss Ruben Amorim chuan, "A chang chuan technical leh tactical lam pawh hi a ni ber lo, kan theihtawp kan chhuah a, kan hneh a ni mai.

"Chance tam tak rawn nei mah se, chak kha kan phu a ni. Anni pawh chak loh kha an phu bik lo, chutih laiin chak kan phu a ni. 

"Ball kan chang tam lo chung khan inkhelh kan thunun thei a ni. Fans lam pawh kan tan an ṭangkai kher mai. Tunah chuan hahchawlhna hun kan nei ve thei dawn, player te an chau hle a ni," tiin a sawi.

Kar hmasa khan United hian 2-2 in Liverpool an inhnehtawkpui a, an defending lamin nasa takin hma an sawn tih a chiang. Amorim pawhin a tlarhnung a fak hle.

"Second half ṭantir aṭang khan engkim kha a kaltluang dawn niin ka hria, penalty kan pet dawnah pawh khan ka thla a muang em em.

"An chetṭhat hun a ni lo niin ka ngai a, ka ngaihdan a dik chiah. Tin, kan tlarhnung te khelh danah ka lawm hle, set-piece ah te khan kan dang hneh hle a ni," tiin Amorim chuan a sawi bawk.

Manchester United hian FA Cup Fourth Round-ah Ruud van Nistelrooy-a enkawl Leicester City an hmachhawn dawn a ni.

ARSENAL VS MAN UNITED (MATCH REPORT)