CARLOS KAISER: FOOTBALLER NI CHUNGA INKHEL DUH MIAH LO CHU!

Football-ah hian chanchin danglam tak tak a tam a, hun hlimawm leh lungchhiatthlak tak takte awm mahse nuihzatthlak leh awihawm loh khawpa dangdaite pawh a awm nawk mai.

Midang hmanga sum siam tum tlatte pawhin football-ah hian sulhnu an nei fo tawh a, sawi tur tam tak awm mahse inkhel duh miah si lo va club zawm hnem deuh chanchin hi thlir ho teh ang.

                                                      A HMING CHU KAISARA

Carlos Kaiser tia hriatlar Carlos Henrique Raposo hi 2 April, 1963 khan Selangor, Malaysia-ah a piang a, Malaysia-a piang ni mahse Brazilian a ni thung.

A hminga 'Kaiser' a tih chhan hi Germany player ropui ni ṭhin Franz Beckenbauer (Der Kaiser tia a hminglem an vuah) vang niin an sawi a, a naupanlai aṭangin he hming hi a pu tawh.

A ṭhianpa Luiz Maerovitch erawh chuan Kaiser an tih chhan hi Beer chi khat 'Kaiser beer' vang zawk niin a sawi a, Kaiser beer hi Mexican company pakhat siamchhuah a ni.

                                                    KAISARA RAWLTHAR CHANCHIN

Rawlthar anihin Carlos Kaiser hian Brazilian club Botafogo a zawm a, he club-ah hian kum khat (1972-1973) a awm.

Botafogo aṭang hian Flamengo-ah a insuanin kum hnih a awm leh a, kum 1979 khan Club Puebla chuan la ṭha chho thei ni a ngaiin an lalut.

Mexican club-ah hian thla (month) tam pawh awm lovin a chhuahsan a, an beisei san tehlul nen game khat mah a khel lo.

                                                       LEMCHAN THIAM KAISARA

Mexico aṭang hian Brazil-ah a kir a, heta ṭang hian lemchangin a hun a hmang chho.

Carlos Kaiser hian a hunlaia footballer lar tak takte ṭhianah a siam a, a ṭhian siam zingah hian World Cup-a Brazil champion pui thei Carlos Alberto Torres leh Ricardo Rocha-te pawh telin, 1989 Copa America-a Brazil champion puitu Renato Gaucho pawh a tel.

Milar ṭhiana a siam chhan hi club thar a neih theihna turin a ni a, thil tih a awlsam nana ti a ni a, sawipuitu a mamawh.

Carlos Kaiser hian footballer ṭha tak ni turin sa inphut tawk tak a nei a, a thiamna (skills)-in a tlin lo thung.

Club a bum dan pakhat chu hunrei lote atan inremna (contract) a ziahpui a, intihsiakna hmachhawn turin a chak (fit) tawk lo tih a sawi leh a, an rinhlelh lohna turin kar khat vel a training hram ṭhin.

Midang bula a training hian kaiza tha (hamstring) hliam nei angin a in sawi fo a, a hunlai hian a hliam/na ngei em tih hriat theihna hmanrua ala awm lo.

A hliam enkawl an tumin natna vang tak a vei tih hriatpuina a nei roh si a, he hriatpuina hi ha doctor (dentist) pakhat siamsak niin club hian tihzui vak ngaihna an hre ṭhin lo.

Hetiang kalphung hmang hian club hrang hrangah training chiah neiin reilo tete a awm kual a, a tider tih tumahin an hre lo.

Mi a bum theihna tur hian dawt ziak hreh lo chanchinbu mi hmelhriat a nei leh zel a, hei hian Carlos Kaiser chanchin uchuak takin a chhuah ṭhin.

A thuziah pakhatah chuan Carlose Kaiser hi Puebla tana che ṭha em em angin a chhuah a, Mexico pawhin an ram tana khel turin an sawm hial tih a tarlang.

Carlos Kaiser hian mobile phone pawh a nei thlap a, a hunlaia to em em leh mi nazawng neih phakloh a ni.

Phone hmang hian ramdang ṭawngin amah dawrtu ni awm tak takte a be kual a, rampawn aṭanga dawrtu erawh a nei hauh lo.

Hetianga a khawsak chhan hi chu player ṭha leh club dang awh em em anga lan a tum vang a ni a, tunlai ṭawng takin a in lak 'value' vena a ni ber mai.

                                                   KAISARA A LUCK; CLUB A NGAH

Mexico aṭanga Brazil a pan leh hnu khan Botafogo-ah a kir leh a, hetah hian hliam nei derin vawikhat mah an chhawr lo.

Botafogo-a a awmlai hian plastic hmanga siam phone a leklam hle a, English hmang ni awm taka langin ramdang club a be der ṭhin a, a awm mekna club laka hun a khawhral duh vang a ni.

A phone lem hmang hian a che fuh rei lutuk lo. Botafogo-in club doctor atana an chhawr pakhat chuan english alo thiam a, Carlos Kaiser hi an man chhuak.

Botafogo aṭangin a awm tawhna ṭhin tho Flamengo a zawm leh a, hetah hian hliam nei der lehin rei vak lo a awm.

Carlos Kaiser hian Argentine club Talleres de Cordoba leh Independiente tan a khel tawh tihte a sawi ṭhin a, Argentina-ah hian Alejandro chuan a buaipui ṭhin niin a sawi bawk.

Alejandro hi kum 1986 World Cup-a Argentina champion puitu Jorge Burruchaga ṭhian niin a sawi a, 1984 Copa Libertadores leh 1984 Intercontinental Cup-a Independiente champion puitu Carlos Enrique angin a sawi ṭhin bawk.

Kum 1986 khan Brazil a chhuahsan ve ta tak tak a, Europe-ah kalin French Division 2 club Gazelec Ajaccio chuan an lalut.

French club hian an fan-te hmaa an phochhuah rualin training an neihpui a, hemi ṭumin hian ball chhaih kual lovin fans lamah a pet liam vek a, club logo a fawp kual vel bawk.

Ajaccio tan hian vawikhat pawh khel lovin kum 1987 khan Brazil-ah a kir a, a chanchin erawh a letling thawkin thehdarh a ni zui.

Chanchinbu mi nen inkawpin Ajaccio tan hian season riat a khel niin an tarlang a, goal khung hnem berte pawh a ni nghe nghe.

Ajaccio tana kum li chhung khel tawh Fabio "Fabinho" Barros chuan Carlos Kaiser hi alo hrechiang nasa mai a, Carlos Kaiser hian Ajaccio hmunpui Corsica-ah hniak khat pawh a hnutchhiah lo tih a sawi.

Fabinho nen hian Ajaccio jersey haa thlalak dunna an nei a, he thlalak hmang leh Identity Card lem hmangin France rama che ṭha takin a lang ta a ni.

France a chhuahsan hnu hian Brazilian club Bangu Atletico Clube a zawm a, a chhuanlam ngai bawk hmangin intihsiaknaah a khel ngai lo.

A khawsak dan hi Bangu sponsor-tu lian ber leh an club-a thuneihna nei Castor de Andrade chuan a ngai thei lo va, a training lai chiah hmuh reng ringawt mai chu a hne hle.

Vawikhat chu intihsiaknaah 2-0 in an chak lo mek a, Castor chuan Bangu coach hnenah Carlos Kaiser luhtir turin thu a pe a, khelmual sirah in tih lum tirin a in sawizawi.

Khelmual sira a in sawizawi lai hian fans ṭhenkhatte'n player ho an lo au nawmnah a, hei hi remchangah la in fan-te hi insual pui a, red card pek niin khelmuala lut thei a ni leh ta lo.

A insawifiahnaah chuan fan-te hian 'rukru' tiin an ko tih a sawi a, a chaw tui tih ber dawt hmangin a in chhanhim.

Bangu hian dawt tih hre lovin an awih hmin der a, ngaidamin thlaruk daih tur contract thar a ziahbelh ta zawk.Bangu a chhuahsan hnuin Fluminense-ah kum khat chhung dawt hmangin a awm leh a, a inhliam leh char char.

Fluminense-ah hian phone lem hmang bawkin club dang a be der ṭhin a, midang hriat laiin club dang sawmnate a hnar ṭhin.

Lang lo tura thuruk awm hek lo le, Fluminense-a assistant ni lai pakhatin a lemchan hi a man chhuak a, an hnawtchhuak nghal.

Fluminense a chhuahsan hnuin Vasco da Gama a zawm a, hetah hian inkhel tur ni lovin player pakhat zu ngawlvei buaipui turin an lalut.

Zu a in ngailoh avangin Vasco-ah hian mi ṭha tak angin a awm a, a hming pawh a ṭha fu mai.

                                                FOOTBALL PIAHLAMA KAISARA SULHNU

Carlos Kaiser hian manchhuah tawkin hnawhchhuah pawh tawk fo mahse club a nei thei reng a, entawn tlak tak nilo mahse mifing ve tak a ni tih erawh phat rual a nilo.

Kum 2015 November thla khan Carlos Kaiser hian UK production company pakhat, Nods & Volleys Entertainment Limited chu inremna a ziahpui a, a chanchin tarlanna film an siam.
 
A flim hming hi 'Kaiser! The Greatest Footballer Never to Play Football' tih a ni a, 21 April, 2018 khan Tribeca Film Festival-ah a vawikhatnan khawvel hmuhah an phochhuak.

Rob Smyth pawhin Carlos Kaiser chanchin hi ziakin lehkhabu a siam a, a lehkhabu hming hi 'Kaiser: The Greatest Footballer Never to Play Football' tih niin kum 2018 khan tlangzarh a ni.

Carlos Kaiser nunah hian thil ṭha zirchhuah tur a vang hle a, a chanchin danglam tak erawh football thawnthu buah a chuang ve reng tawh dawn a ni.