Cardiff City chu FIFA chuan Nantes hnena Emiliano Sala man thenkhat pe turin an ti a, Sala manah hian €6 million (£5.3 million) chu an pek a ngai dawn a ni.
Welsh club Cardiff City chuan an club player man to ber ni turin Emiliano Sala kha French club Nantes atangin €17 million (£15 million) zeta lei turin engkim an tifel a. Kum 28-a upa Sala chuan Cardiff zawm turin Wales ram a pan a, thlawhtheihna hmangin an chesual zui ta a ni.
Emiliano Sala te an chetsual leh tak si avangin Cardiff City chuan Nantes hnenah player leina man pek chu an hreh leh ta deuh a. Club pahnihte hi an innawr ve reng a, an inrem theih meuh loh avangin a tawpah FIFA chu an inrawlh phah ta a ni.
FIFA chuan Cardiff City leh Nantes te inkara buaina chu chin fel tumin hma an la chho a. Kar hmasaah khan FIFA Players’ Status Committee chu an thu khawm a, hemi hnuah hian thutlukna mumal tak an siam a, Cardiff City chu Emiliano Sala man thenkhat chu Nantes hnena pe turin an ti ta a ni.
Thutlukna an siam hnuah hian FIFA chuan club pahnihte chu ni 10 chhung hun an pe a. Hemi hun chhung hian club pahnihte chuan thutlukna siam a nih theih chhan leh pawisa inpek ngai zat vel inziak chu kimchangin an dil thei dawn a ni.
Thawhtanniah FIFA chuan thu chhuah an siam a, “FIFA Players’ Status Committee chuan he vanduaina thleng chungchang hi ngun takin a ngaihtuah a. Engtik lai mahin a thlahthlam lo a, a ngaihven reng thin a. Club pahnihte inkara harsatna awm pawh ngun takin a ngaihtuah a ni,” tiin an tarlang.
“Ngun taka ngaihtuah a nih hnuah club pahnihte hnenah thutlukna pawh hriattir nghal an ni a. Nantes hnenah hian Cardiff City chuan Emiliano Sala man thenkhat chu an pek a ngai dawn a ni,” an ti bawk.
Kumin January thlaah khan France atanga Wales pana an thlawh laiin kum 28-a upa Emiliano Sala te chuanna thlawhtheihna chu a chesual a, amah leh pilot te chuan nunna an chan phah a ni.
Sala a thih takah chuan Cardiff City chuan a man zat €17 million (£15 million) chu Nantes hnena an pekna chhan tur a awm loh thu an sawi a, an player thar tur chu an la lak luh hman loh avangin an tan a man pek tlak kher a tul lo tiin an tang tlat a ni.