Erik ten Hag chuan Harry Maguire chu captain nihna a hlihsak a, hemi chungchang hi Maguire chuan social media-ah pho langin, a lungawi lo hle nghe nghe. Hetih lai hian tu pawh captain nise, a thlawp tlat tur thu a sawi tel.
Kum 30 mi hi Ole Gunner Solskjaer khan kum 2020 khan United captain nihna a pe a, mahse Erik ten Hag hnuaiah beisei pha lo chhoin, hman tangkai a hlawh lo chho hle. Ten Hag chuan captain thar a thlan tur thu a lo tarlang tawh bawk.
"Manager nen kan inbia a, captain a thlak thu min hrilh. A chhante a sawi fiah bawk a, zep loh chuan lawm a har khawp mai. He kawr ka hak apiang hian ka theihtawp ka chhuah chhunzawm zel tho ang.
"Arm band ka hren chhung zawnga min thlawp tha em em thintu Manchester United fan-te chungah ka lawm tak zet a ni. Kum 3 leh a chanve kalta a he dinhmun ka luah kha tun thlenga ka la inchhuan ber tum a ni hial ang.
"Club chhunga chawimawina sang ber a ni a, Manchester United ka hlawhtlinpui theih nan ka theihtawp tak meuh meuh ka chhuah thin. Khelmual chhung leh pawnah pawh.
"Hun tha tak min siamsak avangin Ole Gunner Solskjaer-a chungah lawmthu sawi ka duh a, he dinhmun luah chhunzawmtu tur hi tu pawh ni se, ka theih tawpin ka thlawp chhunzawm ang a, a hlawhtlin theih nan ka duhsakna sang ber ka hlan e,"tiin Maguire chuan a sawi.
Maguire hian kum 2019 khan Leicester atangin United hi a zawm a, kum 2025 thleng United-ah contract a la nei. Tun nipui bazar inhawn lai hian Manchester United chuan English defender hi hralh an tum niin media te chuan an tarlang mek.
Nikum nipui bazar inhawn laia Lisandro Martinez an lak luh hnuin Maguire hian United-ah hmun a chang tlem ta hle. Foxes atang khan £80m laiin an la lut kha a ni a, mahse tunah chuan thehchhuahna tur United hian an zawng mek nia report a ni a.
West Ham chuan Maguire hi an ngaihven niin BBC chuan a tarlang, Hammers hian £105m laia Declan Rice an hralh hnuin, player thar an melh ve tan mek a, bazarna tur sum chu an ngah dawn tih a chiang, Maguire hi Hammers hian an duh a nih chuan, Manchester United lam pawhin hralh an hnial a rinawm loh.
Hetih lai hian 2025 thlenga Old Trafford-a contract la nei hi a man a to si a, tlawm taka hralh erawh Red Devils hian an phal bik lo maithei a. Mahse hetia captain nihna an hlihsak takah chuan, sum tam tak hloh lo hram hrama hralh an duh dawn niin a lang mek.