Tennis star lar tak thin Martina Navratilova chuan cancer a hneh tih a sawi.

Grand Slam-a vawi 18 champion tawh hian 2010 khan hnute cancer a nei a, a dam hnuah a natna hi chhuak lehin, nikum khan hrawk leh hnute cancer a nei tih an hmuchhuak.

Pawlkut thla khan dam lam a pan zel tih a sawi a, a natna vei hi a stage ala hniam avangin enkawl dam theih ani tih a sawi. Thla hnih vel a liam leh hnuah a dam fel tih TalkTV a hrilh a, enkawlna erawh ala dawng chhunzawm zel dawn tih a sawi.

Nikum Sahmulphah thla khan Texas-ah WTA Finals a chhim a, heta hian hrawkna neiin a dam hleithei lo. Endikna an neih hnuah cancer stage one a ni tih an hrechhuak a, a hrawk ami ang chiah hi a hnuteah an hmu zui bawk.

World number one hlui hian tennis-ah sulhnu a nei ropui khawp mai a, a inkhelh chhungin intihsiaknaah vawi 59 lai a champion hman. Grand Slam-a a champion hnemna ber chu Wimbledon niin vawi kua a champion a, US Open-ah vawi li a champion hman bawk.

Australian Open title pawh vawi thum a la a French Open vawi hnih a chawi bawk. Doubles lamah pawh sulhnu a nei tha khawp mai a, Olympic Games thlengin tawnhriat a nei. Cancer a vei chhung hian a thian leh elpui ni tin Chris Evert-in a pui nasa hle tih a sawi a, a vei nawn tih an hriat khan Krismas a hmuh tawh loh a ring hman tih a sawi.

Evert pawh hian cancer vangin hun engemaw chen buaina a nei a, Navratilova nen hian New York Clinic-ah an in entir dun thin a ni.